Лукашэнка падпісаў Кодэкс аб культуры


Дзяржава замацавала сваё кіраванне ў сферы культуры юрыдычна.

Аляксандр Лукашэнка падпісаў прыняты Палатай прадстаўнікоў і зацверджаны Саветам Рэспублікі Нацыянальнага сходу Кодэкс Рэспублікі Беларусь аб культуры.

У свой час ідэйным натхняльнікам кодэксу стаў былы міністр культуры і цяперашні амбасадар Беларусі ў Францыі Павал Латушка.

Кодэкс налічвае 257 артыкулаў, якія рэгламентуюць усе бакі культурніцкага жыцця ў краіне – ад правоў і абавязкаў аматарскіх калектываў мастацкай творчасці да самога панятку «творчасць».

Гэтак п. 14 арт. 237, які рэгулюе правядзенне дыскатэк, абавязвае тых, хто вырашыць раптам зарганізаваць танцы, узгадняць іх правядзенне з уладамі.

«Юрыдычныя асобы і індывідуальныя прадпрымальнікі, якія арганізуюць правядзенне дыскатэк не на пастаяннай аснове… у мэтах перадухілення надзвычайных сітуацыяў і падтрымання правапарадку павінны ўзгадніць правядзенне дыскатэкі з кіраўніком адпаведнага мясцовага выканаўчага і распарадчага органа або з упаўнаважанай ім асобай за пяць дзён да яе правядзення», – гаворыцца ў законе.

Паводле парталу Pravo.by, аналагаў гэтаму кодэксу ў свеце няма.

Кодэкс уступіць у сілу праз шэсць месяцаў пасля яго афіцыйнага апублікавання.

ДД, belsat.eu

Стужка навінаў