Аляксандр Лукашэнка падчас наведвання МТЗ распавёў пра сваё стаўленне да патэнцыйных кандыдатаў на прэзідэнцкіх выбарах, паведамляе прэсавая служба кіраўніка краіны.
Аляксандр Лукашэнка распавёў, што кепска ведае прэтэндэнтаў у кандыдаты на прэзідэнцтва, акрамя Валерыя Цапкалы. Свае заявы кіраўнік краіны агучыў падчас наведвання МТЗ у Менску.
«Ён, праўда, хітруе. Не кажа, чаму яго прэзідэнт звольніў. Але гэта вы ў яго спытайце – чаму я яго звольніў. Хай шчыра раскажа. І яму потым не захочацца ісці на выбары. Але ён шчыра не скажа. Трэба – скажам, але мы ня хочам займацца гэтым кампраматам», – сказаў Лукашэнка.
На Сяргея Ціханоўскага кіраўнік краіны абрынуўся з крытыкай. Лукашэнка распавёў пра інтэрв’ю блогера ў расейскім выданні «Коммерсант».
«Гэта накшталт незалежная газета ў Расеі. Але мы ведаем, хто яе фінансуе… Нібыта інтэрвʼю бярэ ў аднаго шалудзівага, інакш не назавеш, які тут ходзіць, крычыць па Менску больш, дый у іншых гарадах. Але мы ведаем, на чыіх машынах ён ездзіць, хто яго фінансуе. Гляджу на гэты артыкул, і ўжо вушы тырчаць у гэтага чалавека. Ён нават не кандыдат у прэзідэнты, за жонку там дбае. Разумее ж, што за жонку ніхто не прагаласуе ў Беларусі», – заявіў Лукашэнка.
Пры гэтым кіраўнік краіны заявіў, што жанчыны прэтэндэнткі больш сабралі подпісаў, чым мужчыны. Але, на думку Лукашэнкі, у жанчынаў няма шанцаў на абранне прэзідэнтам.
«У нас Канстытуцыя не пад жанчыну. І ў нас грамадства не саспела для таго, каб галасаваць за жанчыну. Таму што ў нас паводле Канстытуцыі прэзідэнт валодае моцнай уладай. У нас не Літва. Там прэзідэнтам была Даля Грыбаўскайтэ, прыйшла, паўсміхаліся, пасядзела і пайшла. Ні за што не адказвае, таму што там парламенцкая рэспубліка. У нас – не. Прэзідэнтам будзе мужык, я ў гэтым абсалютна перакананы», – заявіў Лукашэнка.
СК belsat.eu