Кіраўнік дзяржавы запатрабаваў «перабудаваць, перарабіць, перакроіць» праграмы ВНУ. На пленарным пасяджэнні II З’езда вучоных Беларусі ён распавёў, як нядаўна сустракаўся з прадстаўнікамі IT-сферы.
Паводле Лукашэнкі, IT-бізнесмены з асаблівым болем адзначалі недахоп працоўных рук. Айцішнікі папрасілі яго дазволу «выдаваць свае грошы на падтрыманне ВНУ і выкладчыкаў», каб яны рыхтавалі патрэбных для іх студэнтаў.
Лукашэнка лічыць, што выкладчыкі могуць расчараваць спонсараў.
«У нас кіраўніцтва ВНУ, рэктары пабранзавелі і параслі некаторыя цінай. Я ўжо не кажу пра выкладчыкаў. Яны рыхтуюць людзей, якія ўжо сёння не могуць працаваць, не кажучы пра заўтрашні дзень. У нас шмат якія ВНУ і выкладчыкі са сваймі жоўтымі канспектамі плятуцца ў хвасце падзеяў».
На ягоную думку, навука і выкладанне ў беларускіх ВНУ адсталі ад развіцця вытворчасці і яе мадэрнізацыі.
«Трэба перабудоўваць, перарабляць, перакройваць праграму, трэба арыентаваць адукацыю на заўтрашні дзень, трэба рыхтаваць выкладчыкаў, а ўжо потым ставіць пытанні аб аплаце», – заявіў ён.
11 снежня Лукашэнка правёў нараду па праекту дэкрэту «Аб развіцці лічбавай эканомікі», на якой паабяцаў беларускай IT-суполцы стабільнасць, неўмяшанне і падпісаць гэты дэкрэт да канца гэтага году.
ДР belsat.eu