15 снежня Лукашэнка падчас рабочай паездкі ў Магілёў наведаў абласную клінічную больніцу і паглядзеў, як аказваюць дапамогу хворым на каронавірус.
У шпіталі ён наведаў некалькі аддзяленняў, дзе праходзяць лячэнне хворыя на COVID-19, паразмаўляў з медыкамі, якія працуюць у «чырвонай зоне». Затым ён сустрэўся з калектывам і пацікавіўся, хто з медыкаў перахварэў каранавірусам. Між іншага Лукашэнка таксама заявіў, што хоча захаваць суверэнітэт Беларусі.
«Я хачу, каб вы разумелі маю пазіцыю, яна нязменная: давайце жыць дружна, захаваем краіну (а мы яе захаваем, чаго б нам гэта ні каштавала, і не для мяне, і не для яго – гэта ўжо для ўнукаў). І гэта мая галоўная задача. Усё будзеце вырашаць вы. Абяцаю вам: усё будзеце вырашаць вы», – падкрэсліў ён.
Лукашэнка таксама сказаў медыкам, што не імкнецца ўтрымаць уладу любым коштам, аднак і здаваць краіну, склаўшы рукі, таксама не збіраецца.
«Я нікуды не пабягу, каб вы ведалі. Нікуды. Добра, што час прайшоў, і людзі ўбачылі, хто рваўся да ўлады. Справа не ўва мне. Я часта кажу: я сваё адпрацаваў. Мне шкада, што будзе пасля гэтага», – сказаў ён.
Лукашэнка закрануў таксама тэму пратэстных настрояў сярод медыкаў. Ён выказаў упэўненасць, што дактарам няма часу «бадзяцца па вуліцах».
«Доктару некалі бадзяцца па вуліцах. Доктар павінен лячыць. Ёсць у вас прэтэнзіі да ўлады – я да вас прыехаў, выказвайце прэтэнзіі. Вы – мае выбарцы, выказвайце прэтэнзіі», – звярнуўся Лукашэнка да медыкаў (цытата zviazda.by).
ДР belsat.eu