Беларусь пачынае супрацу з Азіяцкім банкам інфраструктурных інвестыцыяў з будаўніцтва дарогаў. Аб гэтым Аляксандр Лукашэнка заявіў 5 верасня на сустрэчы з прэзідэнтам гэтага банку Цзінь Лі Цюнем, паведамілі ў прэс-службе кіраўніка Беларусі.
Лукашэнка адзначыў, што бакі пачынаюць супрацу з «белага аркуша», і падзякаваў Цзінь Лі Цюню за намер працаваць інвеставаць сродкі ў беларускія дарогі.
Кіраўнік Беларусі заявіў, што краіна робіцца важным напрамкам з прычыны развіцця сувязяў паміж Азіяцка-Ціхаакіянскім рэгіёнам, Кітаем і Заходняй Еўропай. Таму для магчымай супрацы на бліжэйшую перспектыву ён прапанаваў заняцца будаўніцтвам дарогі Лепель – Полацк на поўначы і Гомель – Берасце на поўдні.
«Вось дзве дарогі, якія я асабіста мару пабудаваць у бліжэйшы час», – адзначыў Лукашэнка і дадаў, што АБІІ ўжо гатовы падтрымаць будаўніцтва дарогі на Полацк.
Гатовы ён таксама «пагаварыць і выбраць лепшы варыянт» адносна другой дарогі.
Таксама кіраўнік Беларусі разлічвае, што банк можа «укласціся» у інфраструктуру Кітайска-беларускага індустрыяльнага парку «Вялікі камень». Разлічвае ён і на дапамогу ў сферах энергетыкі, водаадвядзення, рэнавацыі жылых будынкаў.
МГ belsat.eu