Лукашэнка кажа пра больш за сотню затрыманняў за пастаўкі запчастак


Аляксандр Лукашэнка. Фота: president.gov.by

Кіраўнік Беларусі Аляксандр Лукашэнка падчас візіту ў Баранавічы 22 сакавіка заявіў пра больш як сотню затрыманняў у справе аб пастаўках запасных частак. Такая інфармацыя прагучала ў эфіры тэлеканалу «Беларусь 1».

Паводле Лукашэнкі, затрыманыя пасярэднікі «па нейкіх падшыпніках». Ён адзначыў, што, як зачапілі адно звяно, «па ўсёй краіне пакацілася».

«А людзі не маўчаць. Людзі прыходзяць і здаюць усіх з трыбухамі», – заявіў кіраўнік дзяржавы.

Лукашэнка ў Баранавічах: прадпрыемствам – больш зарабляць, чыноўнікам – утрымліваць цэны

Раней інфармацыі пра буйныя затрыманні ў сферы закупаў запчастак не было. Толькі ў канцы лістапада 2018 года Камітэт дзяржкантролю паведаміў, што адно з камунальных прадпрыемстваў Гомельскай вобласці, закупаючы імпартныя запчасткі ў рэгіянальных пастаўшчыкоў, паралельна набывала іх жа ў пяці падкантрольных ІП па цане ў некалькі разоў большай за іх сапраўдны кошт. Гэтыя прадпрымальнікі набывалі запчасткі ў тых жа пастаўшчыкоў, а тавар наўпрост ішоў са складу рэгіянальнага пастаўшчыка на склад камунальнага прадпрыемства.

Часам гандлёвая надбаўка пасярэднікаў да цаны рэгіянальнага пастаўшчыка дасягала 800 %. Схема дзеяла цягам 2016-2018 гадоў.

Лукашэнка выйшаў да жыхароў Баранавічаў. Яны пыталіся яго пра курыцу

За пастаўленыя запчасткі прадпрыемства наўпрост ІП грошы не пералічвала. Сродкі паступалі на іх рахункі ад суб’ектаў, якім прадпрыемства аказвала камунальныя паслугі. Пасля грошы размяркоўваліся паміж дырэктарам прадпрыемства і іншымі зацікаўленымі асобамі.

У выніку закупак запчастак па завышаным кошце прадпрыемству нанесеная шкода большая за 500 тыс. рублёў. Па гэтых фактах была распачатая крымінальная справа паводле ч. 4 арт. 210 КК. У ёй падазраванымі прызналі 8 чалавек. Дваіх з іх (уключаючы дырэктара прадпрыемства) заключылі пад варту.

МГ belsat.eu

Глядзі таксама
Каментары