Кіраўнік Беларусі на нарадзе 19 чэрвеня, прысвечанай падтрыманню рэальнага сектару эканомікі з боку банкаўскай сістэмы, заявіў пра неабходнасць сканцэнтраваць рэсурсы ў эканоміцы.
«Нам трэба сабрацца і жыць у тых умовах, у якіх мы знаходзімся. Калі ў Нацбанку і асобныя чальцы ўраду гэтага не разумеюць, значыць, рыхтуйцеся на выхад. Іншага не дадзена. Трэба сканцэнтравацца. Усе рэсурсы аб’яднаць», – падкрэсліў Аляксандр Лукашэнка, паведамілі ў ягонай адміністрацыі.
Паводле яго, у эканоміцы няма катастрофы, «але ёсць пэўныя праблемы, звязаныя з тым, што свет зачыніўся».
Кіраўнік Беларусі таксама паабяцаў «жалезабетонна» разабрацца з прыватнымі прадпрыемствамі, якія затрымліваюць заробкі працаўнікам, бо «загуляліся ў палітыку замест таго, каб займацца бізнесам, пашыраць яго, паглыбляць і даглядаць сваіх людзьмі». Іншым жа прадпрыемствам, якія сапраўды патрапілі ў складанае становішча, «трэба дапамагчы».
Лукашэнка таксама паведаміў, што «актывізаваліся пэўныя сілы, якія пачынаюць інтэнсіўнічаць, разгойдваючы сітуацыю ў краіне».
«Але нам усё ж такі ўдалося зрабіць некаторыя крокі на апярэджанне і сарваць маштабны план дэстабілізацыі Беларусі (гэта не жарт і не запалохванне) і прывесці краіну да нейкага Майдану. Такая была мэта. Маскі сарваныя з пэўных не толькі лялек, якія ў нас тут былі, але і лялькаводаў, якія сядзяць за межамі Беларусі», – сказаў ён.
Паводле яго, ён нікому не дазволіць «зламаць гэтую краіну».
МГ belsat.eu