Аляксандр Лукашэнка заявіў, што не мае намеру займаць пасаду кіраўніка дзяржавы да самай смерці, прыводзіць яго словы дзяржаўнае агенцтва БелТА.
«Я не прыглядаюся, дзе гэты прэзідэнт (новы прэзідэнт Беларусі – заўвага). Але ён недзе ёсць ужо. Я ж не на вякі, і да смерці я прэзідэнтам не буду. Я проста хачу калі-небудзь пажыць, як усе людзі, – спакойна», – сказаў Аляксандр Лукашэнка падчас сустрэчы з прадстаўнікамі ўкраінскіх СМІ.
Разам з тым Лукашэнка адзначыў, што будзе працаваць на пасадзе прэзідэнта столькі, колькі людзі давяраюць.
«І пакуль ёсць здароўе. Калі нездаровы – значыць няма чаго сюды лезці. Галоўнае – здароўе і давер людзей», – заўважыў кіраўнік дзяржавы.
Паводле яго словаў у Беларусі не разглядаюць варыянту транзіту ўлады.
«Наш прэзідэнт будзе абраны толькі народам», – падкрэсліў кіраўнік дзяржавы.
Адказваючы на пытанне пра дзяцей, Лукашэнка адзначыў, што «мае дзеці не хварэюць жаданнем стаць прэзідэнтам – ні адзін, ні другі, ні трэці».
«Яны» наеліся «майго прэзідэнцтва», – дадаў ён.
Аляксандр Лукашэнка займае пасаду прэзідэнта краіны з 1994 году. Цягам 25 гадоў, пакуль Лукашэнка ва ўладзе, у Беларусі чатыры разы прайшлі прэзідэнцкія выбары, якія не былі прызнаныя міжнароднымі назіральнікамі як свабодныя і празрыстыя. Аляксандр Лукашэнка кожны раз агучваўся ЦВК як пераможца. Наступныя выбары прэзідэнта ў Беларусі адбудуцца ў 2020 годзе.
СК belsat.eu
