16 красавіка кіраўнік Беларусі з афіцыйным візітам наведаў Анкару. На перамовах з турэцкім лідарам краіны абмеркавалі «двухбаковыя дачыненняў з акцэнтам на пашырэнне гандлёва-эканамічнага ўзаемадзеяння», падае прэсавая служба кіраўніка Беларусі.
«Нашая сустрэча паклала пачатак новаму ўзроўню ўзаемаадносінаў ва ўсіх сферах. Галоўнае зараз – каб профільныя міністры і ўрад выканалі нашыя дамоўленасці, – заявіў Лукашэнка. – Мяркую, цяперашні ўзровень развіцця нашага партнёрства дазваляе нам ставіць яшчэ больш амбітныя мэты».
Падчас перамоваў Лукашэнка заявіў, што Турцыя – адзін з ключавых партнёраў Беларусі ў рэгіёне, а ўзаемадзеянню з ёй Менск надае вялікае значэнне.
Першы афіцыйны візіт турэцкага прэзідэнта ў Менск адбыўся ў лістападзе 2016-га.
У студзені 2019-га Рэджэп Эрдаган запрасіў беларускага калегу наведаць Турцыю.
Нягледзячы на відавочную сімпатыю паміж двума лідарамі (Лукашэнка называе Эрдаганам «сваім сябрам»), палітолагі лічаць, што Беларусь будзе намагацца супрацоўнічаць з Турцыяй нягледзячы на тое, хто ёю будзе кіраваць.
«Для Беларусі Турцыя – гэта магчымы газ і ў перспектыве магчымая нафта з улікам, што па Украіне ідзе нафта провад «Адэса–Броды», якім прынамсі раз ужо скарысталіся», – кажа «Белсату» палітолаг Вольга Харламава.
ДД belsat.eu