Кіраўнік дзяржавы паабяцаў спыніць ціск з боку кантрольных ды іншых структур.
«Расказвайце пра існыя праблемы, уносьце канструктыўныя прапановы і, самае галоўнае, нічога ня бойцеся», – сказаў Аляксандр Лукашэнка на нарадзе з чальцамі рабочай групы ў пытаннях удасканалення кантрольнай дзейнасці і выключэнні залішніх патрабаванняў да бізнесу.
Ён заклікаў бізнесоўцаў да «шчырага і адкрытага дыялогу.
«Звяртаюся да прадстаўнікоў дзелавых колаў, асабліва тых, якія тут прысутнічаюць. У працэсе працы вам даводзіцца непасрэдна сутыкацца з мноствам абсурдных патрабаванняў і бясконцай чарадой праверак. Я вас заклікаю да максімальна сумленнага і адкрытага дыялогу ў групе», – сказаў Лукашэнка.
Кіраўнік дзяржавы паабяцаў асабіста зацвердзіць мінімальны набор правілаў для вядзення бізнесу. Ён сустрэўся з прадстаўнікамі бізнесу пасля таго, як 9 лютага МНС цалкам спыніла праверкі малога і сярэдняга бізнесу.
Другі год запар у Беларусі скарачаецца колькасць індывідуальных прадпрымальнікаў. Паводле Міністэрства падаткаў і збораў, з пачатку 2015-га года іх колькасць скарацілася на 13 тысячаў. Найбольш ад праверак з боку МНС пакутавалі індывідуальныя прадпрымальнікі.
Паводле экспертаў, чарговая спроба лібералізацыі ў бізнесе скіраваная не толькі да айчынных прадпрымальнікаў, але і да замежных інвестараў. Напярэдадні стала вядома, што ў 2016-м годзе абʼём замежных інвестыцыяў знізіўся на два $ 2 млрд 700 млн у параўнанні з 2015-м годам.
Апошняя гучная справа, якая ўскалыхнула беларускі бізнес – затрыманне Аляксандра Кныровіча.
Яго разам з некалькімі калегамі затрымалі па падазрэнні ў дачы хабару чыноўніку. 9 лютага яму выставілі абвінавачванне: ухіленне ад сплаты падаткаў у асабліва буйным памеры.
27 студзеня Лукашэнка пракаментаваў затрыманне бізнесоўца Аляксандра Кныровіча. Ён сказаў, што «злодзей павінен сядзець у турме».
Адметна, што Аляксандр Кныровіч ацаніў кошт рэзідэнцыі ў Шаршунах, у якой, паводле мясцовых жыхароў, адпачывае кіраўнік дзяржавы.
Эксперты бачаць у затрыманні Кныровіча палітычны складнік.
ДР belsat.eu паводле belta.by