У тэлефоннай размове з прэзідэнтам Арменіі Армэнам Саргсьянам Аляксандр Лукашэнка заявіў, што ў апошнія паўгады Беларусь не накіроўвала ваенных грузаў у Азербайджан ці Арменію.
Пра тэлефонны званок распавёў тэлеканал ОНТ. Гэтак Лукашэнка абвяргаў інфармацыю пра тое, што Беларусь напярэдадні ажыццявіла пастаўку ваеннага грузу ў Азербайджан.
«У размове быў дадзены дакладны адказ на фэйкавую інфармацыю», – сказаў Лукашэнка.
У чэрвені 2018 года Беларусь прадала Азербайджану 10 ракетных сістэмаў «Паланэз». МЗС Арменіі тады выказала незадавальненне:
«Шкадуем, што Беларусь, з’яўляючыся сяброўскай нам краінай, уцягнутая з намі ў шматбаковых фарматах, маючы саюзніцкія абавязкі, прадае ўзбраенне краіне, якая мае з намі канфлікт».
Канфлікт паміж суседкамі Арменіяй і Азербайджанам за кантроль у Нагорным Карабаху абвастрыўся 27 верасня, калі бакі абвінавацілі адно аднаго ў адкрыцці агню.
ЮЦ Belsat.eu
