23 верасня падчас справаздачы Рамана Галоўчанкі, старшыні Дзяржаўнага вайскова-прамысловага камітэту, Лукашэнка адзначыў, што пасля разрыву Дамовы аб ліквідацыі ракетаў сярэдняй і малой далёкасці Беларусь апынулася ў цэнтры ўвагі.
Паводле кіраўніка краіны, Беларусь выступае катэгарычна супраць размяшчэння такога ўзбраення ў Еўропе, паведамілі ў Адміністрацыі кіраўніка дзяржавы.
Знаходзячыся «ў гэтым катле, гарачай палітычнай кропцы», Беларусь не можа не звяртаць увагу на забеспячэнне сваёй бяспекі, падкрэсліў Лукашэнка.
Ён пацікавіўся дзейнасцю камітэту, спытаў, як развіваюцца авіярамонтныя заводы ў Баранавічах і Воршы, кампанія «Тэхніка сувязі» ў Барані. Пры гэтым гаворка ішла не толькі пра аднаўленне дзейнасці, але і пра выпуск найноўшых узораў узбраення.
Лукашэнка нагадаў, што ў Беларусі ўжо стварылі ракету сярэдняй далёкасці, цяпер у планах распрацаваць яшчэ больш магутную зброю, павялічыўшы далёкасць і магутнасць ракетаў.
Зрабіць гэта плануецца на падставе партнёраў з Кітаем, з якім краіна актыўна супрацоўнічае ў ракетабудаванні.
МГ belsat.eu