Лонданская фондавая біржа мае намер перанесці гандаль дзяржаўнымі аблігацыямі еўрапейскіх краінаў з Вялікай Брытаніі ў Італію. Такі крок абумоўлены выхадам Злучанага Каралеўства Вялікай Брытаніі і Паўночнай Ірландыі са складу Еўразвязу.
Штодзённы аб’ём гандляванняў на электроннай платформе Лондану складае ў сярэднім 13,4 мільярдаў еўраў, паведамляе Reuters. Аперацыі прыкладна на 20 % ад гэтай сумы будуць перанесены ў Мілан, у той час як гандляванні брытанскімі дзяржаблігацыямі надалей будуць адбывацца ў Лондане.
Сусветныя гульцы на біржы таксама ўжо пачалі пераводзіць свой бізнес з Брытаніі. Гэтак еўрапейскі філіял BrokerTec, амерыканскай кампаніі CME Group Inc. (група чыкагскай таварнай біржы) перабіраецца з Лондану ў Амстэрдам. Біржавы аператар хоча мець гарантыі таго, што ў выпадку Brexit кліенты Еўропы змогуць і далей працаваць з BrokerTec.
Разам з тым 25 банкаў у Лондане звярнуліся ў Еўрапейскі цэнтральны банк за ліцэнзіямі на адкрыццё хабаў у Франкфурце, і ім давядзецца перавесці туды персанал і аперацыі.
СК, belsat.eu