15-гадовы жыхар Любані Іван Шашко на пачатку снежня быў затрыманы супрацоўнікамі ГУБАЗіКа. Ён – стваральнік другога Telegram-каналу «Карнікі Беларусі», дзе публікаваліся персанальныя звесткі сілавікоў. Цяпер Іван знаходзіцца за мяжой, у сваякоў мамы, піша «Наша Ніва».
Іван Шашко – стваральнік другога Telegram- каналу «Карнікі Беларусі». Спачатку хлопец дубляваў асноўны канал, а потым стварыў свой чат-бот, куды карыстальнікі дасылалі інфармацыю.
Яго затрымлівала 10 чалавек – АМАПаўцы і супрацоўнік ГУБАЗіКа.
Іван распавёў, што білі яго «нямоцна, разбілі губу, у асноўным проста пагражалі, на шчасце, далей пагроз не дайшло». АМАПаўцы казалі, што хлопцу «шанцуе, што няма 18, інакш бы проста «прыбілі».
Дапытвалі яго ў Менску. Міліцыянтаў цікавілі адміністратары і крыніцы інфармацыі.
«Адміністратараў я не раскрыў, а бота ачысціў за пару дзён да затрымання», – запэўнівае Іван.
Допыт быў 3,5 гадзіны, пасля чаго яго адпусцілі дадому.
Паколькі хлопец – непаўналетні, яго было не так проста прыцягнуць да крымінальнай адказнасці. Але ён наогул здолеў уцекчы.
На пытанне, як гэта ўдалося, Іван адказаў:
«Гэта было на мяжы фантастыкі. Расказаць больш – гэта падставіць нерэальна крутых хлопцаў. Але гэта была прыгода. Ведаеце, мне сказалі, што калі-небудзь мы зможам называць услых імёны нашых герояў. Мабыць, тады я змагу сказаць, як гэта было. Але запэўніваю вас, выбраўся я цудам. Літаральна выслізнуў у вушка голкі».
АВ, belsat.eu