Лекараў расейскага палітыка Аляксея Навальнага, якога 28 ліпеня са спецпрыёмніка шпіталізавалі ў лякарню з «вострай алергічнай рэакцыяй», Анастасію Васільеву і Яраслава Ашыхміна 28 не дапусцілі да пацыента. Тым не менш яны здолелі праз дзверы паразмаўляць з ім, сабраць скаргі і анамнез.
Як распавяла ў «Facebook’у» Анастасія Васільева, магла мець месца не алергія, а «таксічнае пашкоджанне скуры і слізістых невядомым хімічным рэчывам з дапамогай нейкага «трэцяй асобы».
«Я, як лекарка, якая лячыла найцяжэйшы апёк паверхні вока ў Аляксея два гады таму – магу з упэўненасцю заявіць, што і ў 2017 годзе, і цяпер – гэта вынік дзеяння нявызначаных хімічных рэчываў. Ніякай алергіі ў Аляксея няма і ніколі не было. Больш за тое – ён еў адну і тую ж ежу з усімі зняволенымі, ніякай новай парфумерыі або сродкаў асабістай гігіены не выкарыстоўваў», – адзначыла лекарка.
Пасля атручвання, на яе думку, палітыка шпіталізавалі менавіта ў больніцу, якой загадвае галоўная лекарка з партыі «Адзіная Расея», каб тая кантралявала кожны крок і лячэнне Навальнага. Асабістых лекараў жа палітыка не пускаюць да яго, каб ніхто не здагадаўся, што выклікала захворванне, лічыць яна.
Анастасія Васільева настойліва раіць праваахоўнікам узяць на хімічную экспертызу пасцельную бялізну Навальнага са спецпрыёмніка, а дактарам – саскоб з скуры і даследаваць валасы, а таксама настаяць на правядзенні судова-медыцынскай экспертызы.
Лекарка палітыка нагадала кіраўніцы больніцы Вользе Шарапавай, што неаказанне медычнай дапамогі караецца ў адпаведнасці з артыкулам 124 Крымінальнага кодэксу Расеі.
МГ belsat.eu
