Два працаўнікі расейскай фірмы «Пиро-Росс«, якія вінавацяць у датычнасці да трагедыі падчас запуску салюту ў Менску 3 ліпеня, не прызнаюць сваёй віны. Зараз 25-гадовы Максіміліян Сапронаў і 28-гадовы Канстанцін Дзянісаў знаходзяцца ў СІЗА, піша TUT.by.
Паводле сваякоў затрыманых, колькі іх яшчэ будуць трымаць, канкрэтыкі няма.
Сястра Канстанціна Дзянісава кажа, што для яе брата гэта была шараговая камандзіроўка. У кампаніі ёй заяўляюць, што затрыманыя толькі дапамагалі рыхтаваць феерверачныя вырабы да запуску, іх дзеянні не маглі прывесці да трагедыі, а да выбуху спрычынілася няправільная закладка беларускімі вайскоўцамі вырабаў у марціры.
Ірына Дзянісава адзначае, што камандзір часткі, дзе загружаліся вырабы, ніякіх заўваг не выявіў.
Яна адзначае, што яе брат супрацоўнічае са следствам. Гэтак жа і кампанія падала следству ўсю неабходную дакументацыю, следчы апытаў у Расеі кіраўніцтва.
Падчас салюту на Дзень Незалежнасці ў Менску загінула жанчына і атрымалі траўмы 10 асобаў. Старшыня Следчага камітэту Іван Наскевіч заяўляў, што зарады для салюту, набытыя ў расейскай кампаніі, не пасавалі пад марціры, таму прадстаўнікі пастаўшчыка, а таксама беларускія вайскоўцы, якія ўдзельнічалі ў падрыхтоўцы салюту, абрэзалі зарады і качалі іх па цвёрдай паверхні, пры тым, што маніпуляцыі з прафесійным піратэхнічным вырабам забароненыя.
Раней Наскевіч таксама адзначаў, што частка вырабаў была пратэрмінаваная.
МГ belsat.eu
