Крымінальная справа, пагрозы і затрыманні. Расея рыхтуецца да суботніх пратэстаў

Аляксей Навальны на акцыі «Адпускай!» 29 верасня ў Маскве. Фота – Антон Карлінэр для Belsat.eu

У суботу, 23 студзеня, у дзясятках гарадоў Расеі павінны прайсці акцыі пратэсту, удзельнікі якіх запатрабуюць вызваліць палітыка Аляксея Навальнага, затрыманага пасля вяртання ў Расею з Нямеччыны.

Акцыі запланаваныя ў дзясятках гарадоў Расеі. У многіх гарадах, у тым ліку ў Маскве, актывістам і журналістам вынеслі засцярогі аб тым, што маючыя адбыцца акцыі незаконныя. Тых, хто плануе пайсці на мітынгі, затрымліваюць і адпраўляюць пад адміністрацыйны арышт, у некаторых выпадках актывістаў збіваюць, паведамляе «Вот Так».

Таксама Следчы камітэт пачаў крымінальную справу за распаўсюд у сацсетках заклікаў ісці на мітынгі ў падтрымку Аляксея Навальнага 23 студзеня. Справа пачатая ў дачыненні да нявыяўленых асобаў за нібыта ўцягванне няпоўнагадовых «здзяйсненне супрацьпраўных дзеянняў, якія загадзя ўяўляюць небяспеку для іх жыцця, праз інтэрнэт».

Генпракуратура і ГУ МУС Расеі ў Маскве апублікавалі засцярогі, у якіх нагадалі пра адказнасць за ўдзел у няўзгодненых акцыях. МУС таксама пачаў даследчую праверку «ў сувязі з арганізацыяй кіраўнікамі штабоў Навальнага правакацыяў і гвалтоўных дзеянняў».

Апроч таго, пад пагрозай штрафаў улады патрабуюць ад соцсетей выдаляць групы, у якіх утрымліваюцца заклікі прыходзіць на мітынгі. Мінасветы заклікала бацькоў школьнікаў ахаваць іх ад акцый.

Аляксея Навальнага арыштавалі на 30 дзён

Сам Аляксей Навальны, якога затрымалі пасля прылёту з Берліну ў Маскву, застанецца за кратамі да 15 лютага. Хімкінскі суд Маскоўскай вобласці, паседжанне якога адбывалася проста ў Хімкінскім аддзеле паліцыі, пакараў палітыка 30-дзённым арыштам.

Аляксея Навальнага затрымалі, бо ён у вышуку за «шматразовыя парушэнні выпрабавальнага тэрміну». Акрамя таго, Следчы камітэт Расеі распачаў у дачыненні Навальнага крымінальную справу аб махлярстве ў асабліва буйным памеры.

Са жніўня палітык быў на лячэнні ў Нямеччыне пасля атручвання рэчывам з групы «Навічок». Па вяртанні ў Маскву палітыка затрымалі проста ў аэрапорце.

Ужо пасля затрымання на Youtube-канале Навальнага выйшла відэарасследаванне пра таемны палац прэзідэнта Расеі Уладзіміра Пуціна.

Палац размешчаны на беразе Чорнага мора ў сяле Праскавееўка Краснадарскага краю. Заяўляецца, што ў рэзідэнцыі Пуціна ёсць падземны лядовы палац, уласнае казіно, тэатр, вялікія вінаграднікі, некалькі верталётных пляцовак ды шмат іншага.

За 16 гадзінаў відэа Навальнага пра палац Пуціна набрала 16 млн праглядаў

Відэа паглядзелі ўжо амаль 60 млн разоў.

МГ belsat.eu

Hавiны