«Круглы стол» Васкрасенскага апублікаваў спіс вязняў, якіх прапаноўвае амніставаць

На сайце «Круглага стала дэмакратычных сілаў», які ўзначальвае Юрый Васкрасенскі, з’явіўся спіс вязняў, якіх трэба вызваліць.

«Круглы стол дэмакратычных сілаў» мае намер звярнуцца на Усебеларускім народным сходзе да дэпутатаў з прапановаю прыняць Закон аб амністыі. На думку Васкрасенскага, які ўзначальвае «Круглы стол», гэта стане сімвалам палітычнай перазагрузкі стасункаў уладаў і грамадства. Установа таксама прапануе і спіс вязняў для амністыі, сярод якіх ёсць сам Васкрасенскі.

Імёны Віктара і Эдуарда Бабарыкаў стаяць побач. На мінулым тыдні справу топ-менеджараў «Белгазпрамбанку», які ўзначальваў Бабарыка-старэйшы, накіравалі ў суд. Сярод падазраваных прызнаць віну адмовіўся толькі ён. Таксама ў спісе і каардынатарка ягонага штабу Марыя Калеснікава.

Нядаўна Васкрасенскі вінаваціў у хлусні Сяргея Ціханоўскага. Тым не менш у ягоным спісе блогер прысутнічае. Як і Мікалай Статкевіч з Паўлам Севярынцам, якія таксама апынуліся за кратамі яшчэ да выбараў.

«Круглы стол дэмакратычных сілаў» прапаноўвае вызваліць і журналістак «Белсату» Кацярыну Андрэеву і Дарʼю Чульцову, якія застаюцца за кратамі з 15 лістапада за асвятленне падзеяў на плошчы Пераменаў. У спісе і аўтарка TUT.BY Кацярына Барысевіч.

Крымінальныя справы супраць людзей, залучаных у спіс, праходзяць розныя стадыі. Некаторыя з абвінавачаных цяпер не ў Беларусі. Агулам у спісе 213 прозвішчаў, і спіс дапаўняецца. Аднак у той жа час сярод прапанаваных да амністыі няма Святланы Ціханоўскай і Паўла Латушкі, у дачыненні якіх таксама завялі крымінальныя справы.

Хто каго і куды выпусціў? І прычым тут Васкрасенскі?

 

Юрый Васкрасенскі – былы сябра ініцыятыўнай групы Бабарыкі, які пасля выбараў апынуўся ў «амерыканцы». На сустрэчы з Лукашэнкам Васкрасенскі сядзеў ад яго па правую руку. Літаральна на наступны дзень ён выйшаў на волю з даручэннем «падрыхтаваць прапановы для зменаў у Канстытуцыю». Зараз займаецца сустрэчамі «Круглага стала», але без асаблівага поспеху. На першую сустрэчу прыйшлі толькі 4 чалавекі. Таксама пад асабістае паручальніцтва Васкрасенскага з СІЗА КДБ вызвалілі некалькі асобаў. Прадстаўнікі апазіцыі абвінавачваюць Васкрасенскага ў супрацы з рэжымам і сілавікамі.

Васкрасенскі абмяркоўваў, як адпусціць Эдуарда Бабарыку пад хатні арышт

ПЯ/СК belsat.eu

 

Hавiны