Амбасадара Расеі ў Беларусі Міхаіла Бабіча адклікаюць з пасады пасла РФ у Менску. Інфармацыю пра гэта 30 красавіка паведаміў «Коммерсант».
Увечары 30 красавіка стала вядома, што замест Міхаіла Бабіча новым амбасадарам прызначаны Дзмітрый Мезенцаў.
Бабіч, які не з’яўляецца карʼерным дыпламатам, лічыўся палітычным прызначэнцам. Перыяд яго працы ў Менску супаў з актывізацыяй лініі Масквы на больш глыбокую інтэграцыю суседняй краінай. Міхаіл Бабіч не прапрацаваў у Беларусі і года, але запомніўся цэлай серыяй скандальных заяў і жорсткай пікіроўкай з беларускім МЗС.
Пра падрыхтоўку адстаўкі Бабіча «Коммерсанту» распавялі некалькі крыніцаў, добра інфармаваных пра сітуацыю вакол амбасадара. «Гэта абмяркоўваецца з мінулага тыдня», – сказаў адзін з іх. Іншы пацвердзіў, што ў бліжэйшы час чакаецца адпаведны ўказ прэзідэнта Расеі Уладзіміра Пуціна.
Крыніца, блізкая да адміністрацыі прэзідэнта Расеі, пацвердзілі і РБК змену амбасадара ў Менску. Па словах суразмоўцы, рашэнне пра змене кіраўніка дыпмісіі, хутчэй за ўсё, было прынята падчас сустрэчы кіраўнікоў Расеі і Беларусі ў Пекіне.
Спадар Бабіч быў прызначаны кіраўніком дыпмісіі ў Менску 24 жніўня 2018 года. На гэтую працу ён перайшоў з пазіцыі паўнамоцнага прадстаўніка прэзідэнта Расеі ў Прыволжскай федэральнай акрузе. Дыпламатычныя суразмоўцы «Коммерсанту» кажуць, што рашэнне накіраваць спадара Бабіча амбасадарам у суседнюю краіну прымалася ў Крамлі. Сапраўды гэтак жа вырашалася і пытанне яго адклікання ў Маскву.
СК belsat.eu
