«Класная рыдала, гаварыла, сама заплаціць». Як у Мазыры бацькоў змушаюць скінуцца на турнікеты
У Мазыры абмяркоўваюць усталяванне турнікетаў у школах. Пра гэта паведаміў чытач тэлеграм-каналу «Пятая калонка».
Паводле мазыраніна, «спачатку сход быў агульны ў актавай зале, усім распавядалі пра турнікеты, і ўсе бацькі былі супраць, маўляў, як ён дапаможа, калі менавіта вучань захоча нешта зрабіць».
Акрамя гэтага, з кожнага вучня кожнага класу хочуць спагнаць па 10 рублёў, а ў наступныя месяцы – па 2 рублі.
«Я, вядома, у цэнах турнікетаў не разбіраюся, але мне здаецца, што гэта зашмат з кожнага класу па 250-300 рублёў, улічваючы, што адных толькі першых класаў там 5 або 6. У канцы агульнага сходу ўсе былі супраць. Тады ім сказалі ісці ў кабінеты. Менавіта ў класе класная майго пляменніка рыдала і ўгаворвала падпісаць дамовы, сказаўшы, што сама ўсё аплаціць са свайго заробку».
Belsat.eu пастанавіў праверыць, ці ёсць школы, дзе бацькі пагадзіліся заплаціць за ўсталяванне і ўтрыманне прылады.
«Праца вядзецца. А навошта вам ведаць?» – сказалі belsat.eu у сярэдняй школе № 2 Мазыра.
«У нас апытанні праходзяць, але пра вынікі нічога не магу сказаць», – адказалі ў СШ № 1.
Дырэктар адной з гарадскіх школаў на ўмовах ананімнасці таксама выказаў сваё асабістае стаўленне.
«Калі б вы пабачылі наш хол, вы б зразумелі, што турнікет там – забойства. Прыдумалі пасля Стоўбцаў. Калі што, хто запэўніць бяспеку 1200 дзецям? Я даслаў здымкі ў Менск, ужо два тыдні маўчаць, нічога не адказваюць. Ніхто з бацькоў гэтых турнікетаў не пацягне. А пагатоў камеры, на якія патрэбныя праекты, ліцэнзія дэпартаменту аховы, усталяванне. Няма такіх грошай. А ўсё астатняе – плясканне языком».
Мы спрабавалі атрымаць каментар намесніка начальніка аддзелу адукацыі Мазырскага райвыканкаму Уладзіміра Ткача, аднак ён не зняў слухаўкі.
***
Трагедыя ў Стоўбцах адбылася раніцай 11 лютага ў СШ № 2. Вучань 10-га класа напаў з нажом на настаўніцу і школьнікаў. Два чалавекі загінулі – педагог і старшакласнік.
ДР belsat.eu
