Міністэрства аховы здароўя паведамляе, што 25 красавіка ў Беларусь мусіць быць дастаўленыя лекі, рэагенты і рэспіратары для барацьбы з эпідэміяй каронавіруса.
Як адзначае прэс-служба Мінздароўя, у Менску з КНР авіярэйс даставіць 310 упаковак супрацьвіруснага сродку Фавыпіравір (гандлёвая марка Авіган), а таксама рэагенты для 9,6 тысячаў тэстаў і 200 тысяч масак-рэспіратараў KN95.
«Усе гэтыя сродкі, прэпараты і вырабы будуць бязвыплатна перададзеныя Міністэрству аховы здароўя прадстаўнікамі кампаніі «Энерга-Оил», – адзначаецца ў паведамленні.
Раней кампанія алігарха Аляксея Алексіна закупіла ў Кітаі 50 тысяч тэстаў на каронавірус і ўжо перадала іх Міністэрству аховы здароўя.
Пра лекі гандлёвай маркі Авіган падчас брыфінгу 24 красавіка казала намесніца міністра аховы здароўя Алена Богдан. Яна назвала гэты прэпарат «эксперыментальным» і сказала, што Беларусь атрымае яго ў бліжэйшыя дні.
Фавыпіравір маркі Авіган – гэта японскі супрацьвірусны прэпарат, пры дапамозе якога раней лячылі грып. У лютым 2020 года ў Кітаі ён стаў выкарыстоўвацца для эксперыментальнага лячэння COVID-19. У сакавіку гэтыя лекі сталі выкарыстоўваць і ў Італіі. Аднак пераканаўчых доказаў эфектыўнасці або неэфектыўнасці гэтага прэпарату пакуль не хапае.
ІІ belsat.eu