Кіраўніца аддзелу па барацьбе з эканамічнымі злачынствамі патрапілася на хабары

Супрацоўнікі ФСБ Расеі затрымалі начальніка аддзелу па барацьбе са злачынствамі ў сферы эканомікі ГСУ ГУ МУС РФ па Самарскай вобласці, палкоўніка юстыцыі Веру Рабіновіч. Падчас затрымання кіраўніца паводзіла сябе дзёрзка і хаміла аператыўнікам.

Аперацыя па затрыманні Веры Рабіновіч і пасярэднікаў пыр перадачы хабару адбывалася 17 і 18 снежня, паведамляе мясцовы інфармацыйны партал «ТЛТгород.ру». Паводле крыніцаў у праваахоўных органах, палкоўнік юстыцыі павінна была атрымаць ад 15 да 20 мільёнаў расейскіх рублёў (225 – 300 тысячаў долараў ЗША).

«Рабіновіч затрыманая ў аэрапорце адразу ж пасля атрымання хабару ў памеры 10 мільёнаў рублёў замест чаканых 15 мільёнаў. Таксама затрыманыя двое пасярэднікаў. Хабар атрыманы ад пацярпелага паводле адной з крымінальных справаў за прыняцце працэсуальнага рашэння аб накіраванні крымінальнай справы ў суд», – сказаў «Інтэрфаксу» прадстаўнік рэгіянальнага УФСБ.

Паводле яго слоў, затрыманых прывезлі ў СІЗА. Затрыманай Рабіновіч пагражае да 15 гадоў калоніі.

«ТЛТгород.ру» адзначае, што ў верасні 2018 года Рабіновіч было прысвоена званне палкоўніка юстыцыі. На думку экспертаў, велізарная сума хабару, якую патрабавала Рабіновіч, ускосна сведчыць, што грошы прызначаліся не толькі для яе.

СК, belsat.eu, паводле newsru.com