Кіраўнік вонкавапалітычнага ведамства Літвы Лінас Лінкявічус звярнуўся да вярхоўнага прадстаўніка Еўразвязу па вонкавай палітыцы і палітыцы бяспекі Федэрыкі Магерыні з заклікам аказаць на Менск ціск у пытанні бяспекі будаўніцтва АЭС пад Астраўцом.
Гэтае пытанне, як паведамляе партал delfi.lt, уздымалася падчас сустрэчы Лінкявічуса і Магерыні ў Бруселі.
«Спадзяемся, што ўсе службовыя асобы ЕЗ, падчас размоваў з беларускімі прадстаўнікамі, абавязкова будуць згадваць і гэтае пытанне», – заявіў Лінкявічус журналістам.
Паводле кіраўніка літоўскага МЗС, ён сустрэў падтрыманне і разуменне Магерыні.
Беларуская АЭС, якая будуецца пры ўдзеле Расеі пад Астраўцом (50 км ад Вільні), будзе мець два энергаблокі. Увод у прамысловую эксплуатацыю першага блока БелАЭС запланаваны на 2018 год, другога – на 2020-ты.
Літва выступае з крытыкай будаўніцтва БелАЭС, заяўляючы, што беларускі бок не забяспечвае ў належнай ступені бяспеку праекту.
ЮВ, belsat.eu, паводле delfi.lt, belapan.by