Міністр замежных справаў Літвы Лінас Лінкявічус заявіў, што сітуацыя з каронавірусам у Беларусі неспрыяльная, таму абмяркоўваецца лёс авіязносінаў паміж Менскам і Вільняй. Пра гэта паведамляе «Інтэрфакс-Захад».
Рэгулярныя рэйсы ў Вільню з Менску ўсё яшчэ выконваюць самалёты авіякампаніі «Белавія».
«Яшчэ і сёння (захоўваюцца) рэгулярныя палёты, аднак у сілу іншых прычынаў у нас узнікае шмат сумненняў, ці пакінуць іх, таму што мы бачым, што сітуацыя з вірусам у Беларусі, здаецца, нядобрая, мякка кажучы», – сказаў міністр на пасяджэнні парламенцкага Камітэту па замежных справах.
«Таму тут ужо трэба балансаваць і ў плане магчымасці вяртання праз Менск, і ў плане прафілактычнай абароны гэтай артэрыі», – сказаў ён.
Беларусь застаецца адзінай дзяржавай у рэгіёне, якое не закрыла свае межы праз пандэмію каронавіруса.
«Як яны спраўляюцца з крызісам – гэта вельмі дзіўна, і ўвесь свет здзіўляецца», – сказаў Лінкявічус.
Паводле Міністэрства аховы здароўя, па стане на 30 сакавіка ў Беларусі былі інфікаваныя на каронавірус 152 чалавекі. 31 стала вядома пра першую смерць ад SARS-CoV-2 у Беларусі. Першай ахвярай стаў актор віцебскага Нацыянальнага драматычнага тэатру імя Якуба Коласа Віктар Дашкевіч. Яму было 75 гадоў.
ІІ belsat.eu