Украінскі МЗС хоча ведаць прычыны і абставіны затрымання сваіх двух грамадзянаў падчас акцыі на Дзень Волі. Пра гэта ў эфіры Hromadske.tv заявіў начальнік управы консульскага забеспячэння Міністэрства замежных справаў Украіны Васіль Кірыліч.
Імя першага затрыманага 25 сакавіка – Руслан Цярэшчанка. Яму прысудзілі 15 содняў арышту, абвінаваціўшы ў дробным хуліганстве і непадпарадкаванні міліцыі.
«Паводле папярэдняй інфармацыі, затрымалі яшчэ аднаго грамадзяніна Украіны, якога ўтрымліваюць у цэнтры ізаляцыі правапарушальнікаў у Менску. Па стане на 17 гадзіну 27 сакавіка рашэнне аб прыцягненні яго да адказнасці не прынятае», – сказаў Васіль Кірыліч.
Яго прозвішча ў эфіры не назвалі.
Паводле Васіля Кірыліча, у бліжэйшы час затрыманага наведае консул, каб пабачыць умовы, у якіх яго ўтрымліваюць.
Гэта не адзіныя замежнікі, якіх затрымалі падчас акцый прымеркаваных да Дня Волі. Вядома пра брытанскага журналіста, з якога затрымалі і здзекаваліся амапаўцы.
Таксама 13 содняў далі грамадзянке Расеі Вользе Рошчынай. Дзяўчыну затрымалі супрацоўнікі АМАПу ў раёне Акадэміі навук. Яна прыехала як турыстка, запытала, як прайсці ў цэнтр, пасля чаго яе скруцілі.
27 сакавіка ў Менску прайшлі масавыя суды над затрыманымі 25 і 26 сакавіка. Содні і штрафы атрымалі больш сотні чалавек.
Поўны спіс затрыманых на акцыях.
Чытайце таксама >>>
ДР belsat.eu