Раніцай 28 лютага Міністэрства аховы здароўя Беларусі паведаміла пра першага носьбіта каронавіруса ў Беларусі. Мы сабралі ўсё, што вядома на гэты момант пра выяўленне віруса ў нашай краіне і далейшае развіццё падзеяў.
Студэнт трэцяга курсу механіка-тэхналагічнага факультэту БНТУ П. прыляцеў у Менск з Баку 22 лютага а 7:10 раніцы рэйсам «Белавіі». Палёт ажыццяўляўся на Boeing 737-5Q8, які, у залежнасці ад кампаноўкі салону, можа перавозіць ад 126 да 132 чалавек без уліку экіпажу.
Адзін з пасажыраў рэйсу ў размове з «Tut.by» распавёў, што рэйс быў поўны, прыкладна палова людзей былі беларусамі.
Праз некалькі дзён П. выклікалі ў студэнцкую паліклініку. Хлопец ні на што не скардзіўся, але медыкаў занепакоіла невялікая тэмпература – 37,3 градусы – і пачырваненне горла.
У юнака ўзялі аналізы. У чацвер лабараторыя Рэспубліканскага навукова-практычнага цэнтру эпідэміялогіі і мікрабіялогіі пацвердзіла наяўнасць у студэнта каронавіруса.
Вядома, што хлопец жыў у інтэрнаце, але часта бываў удома сваёй дзяўчыны Паліны, якая жыве з бацькамі. Быў ён у яе і ўвечары 27 лютага, калі яму пазванілі медыкі і сказалі, каб усе, хто знаходзіцца ўдома, збіраліся ў шпіталь.
У Менскі інфекцыйны шпіталь іранца транспартавалі ў адмысловым боксе, сям’я Паліны дайшла да машыны «хуткай» самастойна.
Паводле медыкаў, П. адчувае сябе задавальняюча. У размове з «Tut.by» Паліна распавяла, што ўсе чальцы яе сям’і таксама адчуваюць сябе нармальна.
Цяпер некаторыя студэнты дзякуюць П. пра адмену параў. Абсалютная большасць каментатараў на «сцяне» хлопца «уКантакце» зычаць яму здароўя.
Дыстанцыйнае навучанне
У БНТУ адмяніў заняткі у аўдыторыях да 15 сакавіка. Паводле Міністэрства аховы здароўя, у шпіталі патрапілі 26 аднагрупнікаў іранскага студэнта і 7 выкладчыкаў.
Каранцін у інфекцыйнай
Менская гарадская клінічная інфекцыйная больніца, дзе ляжыць П., увяла каранцін: уваход на тэрыторыю больніцы забаронены, кансультатыўны прыём планавых пацыентаў часова прыпынілі.
Паводле міністра аховы здароўя Уладзіміра Караніка, за апошнія суткі ў гэтую лякарню шпіталізавалі 16 чалавек.
Студэнт БНТУ з Ірану стаў беларускім «пацыентам 0»
Міністр аховы здароўя Уладзімір Каранік заявіў, што клінічных сімптомаў каронавіруса ў іранскага студэнта няма.
«На сённяшні момант яго нішто не турбуе, – паведаміў міністр. – Лабараторныя даследаванні паказваюць наяўнасць фрагментаў РНК віруса. Гэта можа сведчыць, напрыклад, пра стадыі носьбіцтва. У любым выпадку чалавек знаходзіцца пад медычным наглядам і сёння лячэнне яму не патрабуецца».
Маскі – новы дэфіцыт
Прыкладна з 10:00 пятніцы жыхары Менску адправіліся ў аптэкі. Як распавяла «Белсату» правізорка адной з менскіх аптэк, найвялікшым попытам сёння карысталіся антывірусныя прэпараты і нават антыбактэрыяльныя гелі.
Палова людзей прыходзіць у аптэкі па маскі, але ў продажы іх практычна няма: даўно разабралі.
«Гэта пустое»: Лукашэнка не хоча зачыняць межы, каб абараніцца ад каронавіруса
Беларусь узмацніла санітарна-каранцінныя захады бяспекі на ўедзе ў краіну. Кіраўнік Беларусі Аляксандр Лукашэнка заявіў, што межы закрываць не будуць.
Усе шпіталі Берасцейшчыны зачыняць для наведванняў
Праз падазрэнне на каронавірус у Берасцейскую інфекцыйную больніцу шпіталізавалі дальнабойніка, а таксама сям’ю дзяўчыны, якая вучыцца ў Мілане. У кіроўцы дыягназ не пацвердзіўся. Па словах міністра аховы здароўя, няма прыкмет захворвання і ў чальцоў сям’і студэнткі.
Гарачыя лініі
29 лютага Мінздароўя правядзе гарачыя лініі з жыхарамі ўсёй краіны. Тэлефоны для кожнай з вобласцяў – тут.
Таксама ведамства збіраецца апублікаваць спіс адмысловых цэнтраў па ўсёй краіне, дзе можна будзе здаць аналіз на каронавірус і праз 5 гадзінаў атрымаць вынік тэсту.
COVID-19
COVID-19 – назва хваробы, якую выклікае вірус SARS-Cov-2. У медыях часцей за ўсё яго называюць «новым каронавірусам». Вірус небяспечны для людзей з аслабленым імунітэтам, захворваннямі дыхальнай сістэмы, цукровым дыябетам, а таксама для людзей ва ўзросце ад 60 да 80+ гадоў. Успышка COVID-19 пачалася ў сярэдзіне снежня 2019 года ў горадзе Ўу-Хань у цэнтральным Кітаі.
Што такое каронавірус?
У вірусаў, як у раслін або жывёлін, ёсць розныя сямействы і віды. Каронавірусы – гэта сямейства з пэўнымі характарыстыкамі, якое аб’ядноўвае 40 відаў вірусаў, якія калісьці былі прычынаю эпідэміяў сярод людзей, прыводзяць да вострых рэспіратарных захворванняў, а таксама вірусы, на якія можа захварэць тузін розных відаў жывёлін (ад кажаноў і пацукоў да птушак).
Што рабіць, каб не падхапіць заразу?
- Абавязкова трэба мыць рукі з мылам. Чым часцей, тым лепш! Але рабіце гэта правільна. Тут інструкцыя.
- Не дакранайцеся да рота і твару нямытымі рукамі.
- Узмацняйце імунітэт.
- Лепш не цалавацца і не паціскаць рукі.
- Пазбягайце кантактаў з хворымі.
- Калі ёсць магчымасць, то насіце маску. Мяняйце яе раз на дзве гадзіны.
- Карыстайцеся дэзынфектарамі на спіртавой аснове.
- Праветрывайце памяшканні, у якіх вы жывяце і працуеце.
- Тлумачце дзецям, чаму варта мыць рукі!
ДД belsat.eu
