На пасяджэнні штабу па перадухіленні завозу, распаўсюду выпадкаў і абароне насельніцтва ад каронавірусу паведамілі пра выяўленне аднаго хворага, ён шпіталізаваны.
Стан здароўя пацыента медыкі ацэньваюць як здавальняючы, піша газета «Дзвінская праўда». Устаноўлены і адсочваюцца кантакты 1 і 2 узроўняў.
Прадпрыемствам рэкамендавана па магчымасці абмежаваць камандзіроўкі супрацоўнікаў за межы раёну. Жыхарам таксама варта ўстрымацца ад далёкіх паездак, паходаў у госці і асабістых кантактаў са сваякамі.
Як паведамляюць «Народныя навіны Віцебску», станоўчы тэст на каронавірус атрыманы яшчэ ў двух жыхароў Ушацкага раёну. Абодва гэтых пацыента патрапілі ў больніцу з пнеўманіяй. Усяго ва Ушацкім раёне COVID-19 захварэлі ўжо 8 чалавек. Агулам у Віцебскай вобласці інфекцыя закранула 12 раёнаў.
У Аршанскім раёне колькасць заражаных павялічылася да 15 чалавек, у Гарадоцкім раёне – 4 пацверджаныя выпадкі.
Самая складаная сярод райцэнтраў сітуацыя цяпер у Докшыцах, дзе, паводле выдання, мясцовыя ўлады не агучваюць агульную колькасць захварэлых.
Усяго па стане на 14 красавіка ў Віцебскай вобласці выяўлена 848 выпадкаў інфікавання, агулам па краіне лічба хворых на COVID-19 дасягнула 3 281.
КА belsat.eu