Успышка каронавіруса спрычынілася да адмены шматлікіх падзеяў па ўсім свеце, у тым ліку ў Беларусі. Карэспандэнты «Белсату» склалі падборку найбольш значных падзеяў, якія адмянілі апошнім часам.
У Расеі ўпершыню адменены Пецярбургскі міжнародны эканамічны форум (ПМЭФ). І хоць ён павінен быў прайсці толькі з 3 па 6 чэрвеня, 5 сакавіка стала вядома, што яго правядзенне скасавалі «ў мэтах аховы здароўя расейскіх грамадзянаў, гасцей і ўдзельнікаў форуму».
ПМЭФ – гэта адна з найбуйнейшых бізнес-падзеяў у РФ, якая з 2006 года ладзіцца пры ўдзеле расейскага прэзідэнта. У 2019 годзе на ім прысутнічалі звыш 19 тыс. удзельнікаў з 145 краін свету, уключаючы лідараў Францыі, Нямеччыны, Кітаю і Індыі.
Услед за ПМЭФ 6 сакавіка ў Расеі быў перанесены на нявызначаны тэрмін Краснаярскі эканамічны форум (КЭФ). Таксама «з нагоды падзеяў па супрацьдзеянні каронавірусу». Форум павінен быў прайсці 19-21 сакавіка і мусіў быць прысвечаны рэалізацыі нацыянальных мэтаў развіцця Расеі да 2024 года.
24-27 лютага ў Барсэлоне мусіла прайсці адна з найбуйнейшых у свеце выставаў мабільнай індустрыі – Сусветны мабільны кангрэс (MWC). Але яе адмянілі праз успышку каронавіруса.
Арганізатары канферэнцыі «Google I/O» таксама вырашылі адмяніць падзею, якая павінна была прайсці з 12 па 14 траўня ў Маўнтын-Вію (Каліфорнія, ЗША). Усім распрацоўнікам і наведнікам абяцаюць вярнуць грошы за квіткі і адразу прапануюць забраніраваць білет на канферэнцыю 2021 года. Што будзе з падзеяй сёлета – невядома.
Перадусім на «Google I/O 2020» мусілі распавесці пра ўсе новыя функцыі «Android 11». Але цяпер гэтая прэзентацыя пад пытаннем. Яе могуць перанесці на нявызначаны тэрмін або правесці толькі онлайн.
Швейцарскі ўрад 28 лютага прыняў рашэнне адмяніць усе падзеі, якія абʼядноўваюць больш за 1000 чалавек. Забарона пакуль уведзеная да 15 сакавіка. Яна закранае, у тым ліку, Жэнеўскі міжнародны аўтасалон, які павінен быў адкрыцца 5 сакавіка. Рашэнне прынята ў рамках папярэджання распаўсюджвання каронавіруса.
28 лютага ў Аб’яднаных Арабскіх Эміратах былі скасаваныя фінальныя этапы велагонкі «Тур ААЭ» пасля таго, як у двух раварыстаў з Італіі знайшлі каронавірус. Усе ўдзельнікі велагонкі, адміністрацыйны персанал і арганізатары былі правераныя і змешчаныя ў каранцін у гатэлі на востраве Яс.
Апроч таго, паведамляецца пра скасаванне традыцыйных масавых спаборніцтваў па шахматах у Хашыміне, Дубаі, Шарджы, Бангкоку і Рэйкʼявіку. Адмененыя таксама тэнісныя «Чэленджары»: адзін у Італіі ды чатыры ў Кітаі.
Праз каронавірус прэмʼеру новага фільма пра Джэймза Бонда «Не час памерці» перанеслі на шэсць месяцаў. Першапачаткова меркавалася, што 25-я па ліку кінастужка пра агента 007 выйдзе ў пракат у красавіку. Але ў сувязі з каронавірусам, прэмʼеру перанеслі на лістапад. Дакладныя даты абяцаюць агучыць пазней.
Кожную першую нядзелю месяца ў Італіі ладзяцца акцыі з бясплатным уваходам у дзяржаўныя музеі. З сакавіка традыцыя была прыпыненая ў сувязі з успышкай каронавіруса.
У сувязі з хуткім распаўсюдам каронавіруса Рымская опера да 5 красавіка таксама прыпыніла паказы оперы «Турандот» і балету «Карсар».
Таксама ўлады італьянскага рэгіёну Венета абвясцілі аб адмене Венецыянскага карнавалу. Паводле губернатара Лукі Заі, улады павінны прыняць кардынальныя меры для недапушчэння распаўсюду каронавіруса ў рэгіёне.
6 сакавіка стала вядома, што скасаваная цырымонія ўручэння прэміі міжнароднай акадэміі кіно Індыі, якую таксама называюць Балівудскім «Оскарам». Цырымонія была запланаваная на канец сакавіка ў штаце Мадх’я-Прадэш. Прэмію перанеслі на нявызначаны тэрмін.
У Японіі вырашылі адмовіцца ад правядзення аднаго з найбуйнейшых фестываляў анімэ – AnimeJapan.
На AnimeJapan традыцыйна праходзяць прэзентацыі новых праектаў, а фанаты жанру могуць пагутарыць з прадстаўнікамі індустрыі. Сёлета планавалася правесці 270 экспазіцыяў, у тым ліку 50 замежных. Колькасць наведнікаў фэсту павінна была скласці не менш за 120 тыс. чалавек.
Адмяняюць свае канцэрты і шматлікія музыкі. Гэтак, гурт «Testament» адмяніў канцэрт у Мілане 25 лютага, «Lacuna Coil» – канцэрты ў Дубаі, Бангкоку, Мэльбурне, Сіднэі, Токіа, Осацы, Сінгапуры і Джакарце.
Рокеры з «Green Day», «Slipknot» і Эўрыл Лавін перанеслі свае туры па Азіі.
Мэрылін Мэнсан адмяніў шоў у Гон-Конгу 18 сакавіка, а гурты «Enterprise Earth» і «Supersuckers» перадумалі выступаць у Італіі.
Прэзідэнт Манголіі Халтмаагійн Батулга 12 лютага выдаў указ пра адмену ўсіх святочных падзеяў Цаган Сар (мангольскага Новага года паводле месяцавага календара). Зроблена гэта было, каб перадухіліць распаўсюд каронавіруса.
У 2020 годзе святкаванне Цаган Сар у Манголіі мусіла адбыцца ў ноч на 24 лютага. Адмененыя навагоднія кірмашы па ўсёй краіне, а ў медыях абмежаваная рэклама святочных падзеяў.
Скасаванне розных падзеяў праз каронавірус закранула і Беларусь. Спачатку ў менскім БНТУ, дзе выявілі першы выпадак заражэння ў нашай краіне, студэнтаў перавялі на індывідуальнае навучанне.
Таксама «да асаблівага распараджэння» былі адмененыя некаторыя міні-футбольныя матчы, у якіх мусілі гуляць каманды БНТУ.
У Віцебску, дзе таксама быў выяўлены каронавірус, адмянілі ранішнікі ў дзіцячых садках.
Перанеслі ў Беларусі і некалькі канферэнцыяў. Гэтак, 19 сакавіка ў Менску павінна была прайсці «VI тэхналагічная канферэнцыя InTech-2020», а 24-27 сакавіка – міжнародная выстава «Ахова здароўя Беларусі 2020» і канферэнцыя «e-Health 2020». Даты, на якія перанесеныя гэтыя падзеі, пакуль не называюцца.
МГ belsat.eu
Медыкі з Ўу-Хані распавялі, што было зроблена не так
Часнык і гарэлка – ці абароняць ад каронавіруса?
Колькасць ахвяраў каронавіруса перавысіла 3400 чалавек
«У першы дзень было вельмі страшна!» Студэнты БНТУ ўжо тыдзень на каранціне