Кабінет міністраў Украіны ўхваліў праект пастановы аб прадаўжэнні дзеяння каранціну да 11 траўня ўключна. Пра гэта паведамляе «Укрінфарм».
Рашэнне аб прадаўжэнні каранціну было прынята на пасяджэнні ўрада 22 красавіка.
Прэм’ер-міністр Дзяніс Шмыгаль заявіў, што план выхаду з каранціну складаецца з пяці этапаў, стартавая кропка рэалізацыі – дзень канца каранціну. Кіраўнік Кабміна адзначыў, што пачатак выхаду з каранціну стане магчымым толькі пры ўмове, калі на працягу 10 дзён працэнт выяўленых выпадкаў захворвання ў краіне не будзе мяняцца і будзе вагацца ў межах 5-7%, не больш.
Міністр аховы здароўя Максім Сцяпанаў 21 красавіка заявіў, што Кабмін плануе змякчыць каранцінныя меры. У прыватнасці, з 24 красавіка будуць дазволеныя прагулкі па парках, адчыняць для наведвання музеі і бібліятэкі, аднак таксама з агаворкамі адносна захавання абмежаванняў па дыстанцыі, наяўнасці сродкаў індывідуальнай абароны і г.д.
Нагадаем, каранцін ва Украіне пачаў дзейнічаць з 12 сакавіка 2020 года. З 25 сакавіка ўрад увёў рэжым надзвычайнай сітуацыі па ўсёй тэрыторыі краіны і падоўжыў каранцін да 24 красавіка.
Па стане на 22 красавіка ва Украіне заразіліся каронавірусам 6592 чалавека, 174 з іх памерлі.
ІІ belsat.eu
