Каранік пра даплаты медыкам за працу з «ковіднымі»: «Яшчэ ніхто не сказаў, што заплацілі менш, чымся мусілі»
Міністр аховы здароўя Уладзімір Каранік заявіў у інтэрв’ю газеце «Звязда», што парушэнняў у даплатах супрацоўнікам Бабруйскай станцыі хуткай дапамогі не было.
21 траўня Міністр аховы здароўя Уладзімір Каранік паабяцаў разгледзець скаргі медыкаў, якія мяркуюць, што ім недаплачваюць за працу ў гэтак званых «чырвоных зонах» – установах аховы здароўя, дзе лечаць хворых на COVID-19.
«Па той жа бабруйскай станцыі хуткай дапамогі, з 290 супрацоўнікаў (уключаючы вадзіцеляў і фельдшараў, лекараў) даплаты за красавік атрымалі 118 чалавек. Гэта тыя, хто аказваў меддапамогу пацыентам з каронавіруснай інфекцыяй. І там парушэнні ў даплатах выяўлены не былі. Калі яны ёсць, яны будуць разгледжаны. Для гэтага ёсць устаноўлены законам арбітраж і механізм атрымання даплат», – заявіў Уладзімір Каранік пасля дакладу кіраўніку Беларусі па сітуацыі з каронавірусам у краіне.
Нагадаем, што дзвесце бабруйскіх медыкаў звярнуліся ў Адміністрацыю прэзідэнта з просьбай патлумачыць, каму і колькі грошай павінна заплаціць дзяржава за працу з «ковіднымі» пацыентамі.
«Я, наведваючы медычную ўстанову, чырвоныя зоны, спецыяльна задаю работнікам пытанне: ці атрымалі яны надбаўкі ў тым выглядзе, які прадугледжаны ўказам прэзідэнта? І, пачынаючы ад санітаркі і заканчваючы загадчыкам аддзялення, яшчэ ніхто не сказаў, што заплацілі менш, чым трэба па ўказе. Асноўнае пытанне, напэўна, тычыцца персаналу хуткай медычнай дапамогі або дыягнастычных службаў, якія займаюцца транспартаваннем пацыентаў з каронавіруснай інфекцыяй, або абследаваннем, функцыянальнай дыягностыкай», – адзначыў міністр.
Па стане на 21 траўня ў Беларусі каронавірус выявілі ў 33 371 асобы.
ЮВ belsat.eu
