Новапрызначаны кіраўнік МУС Юрый Караеў падчас свайго афіцыйнага прадстаўлення пахваліў свайго папярэдніка Ігара Шуневіча і заявіў, што ў бліжэйшай будучыні рэзкіх зменаў у дзейнасці міліцыі не прадбачыцца.
«Ваша дзейнасць на пасадзе міністра – для нас прыклад таго, як трэба служыць сваёй Радзіме. Для нас вы – узор мужнасці, адказнасці, актыўнай жыццёвай пазіцыі і зацікаўленасці ва ўсім, што адбываецца навокал. Вашу прыстойнасць не раз адзначалі не толькі падначаленыя, але і кіраўнік дзяржавы, – сказаў Караеў, звяртаючыся да Шуневіча.
У адказ Шуневіч сказаў, што »генерала робіць ягоная армія« і падзякаваў падначаленым.
Караеў таксама паабяцаў надаваць больш увагі дысцыпліне ў шэрагах міліцыі.
«Добра, калі кіраўнікі самі выяўляюць і дакладваюць аб негатыве, але гэтага мала. Неабходна адразу ж прапаноўваць варыянты вырашэння, каб падобнае не паўтаралася», – адзначыў новы міністр.
Пра які канкрэтна «негатыў» гаворка, не ўдакладняецца.
Нагадаем, Юрый Караеў быў прызначаны на пасаду кіраўніка МУС 11 чэрвеня пасля таго, як Ігар Шуневіч падаў у адстаўку.
КА belsat.eu
