17 лістапада ў горадзе Іўе ўся Гарадзенская вобласць адзначае штогадовае свята «Дажынкі». Ва ўрачыстасці ўзялі ўдзел прадстаўнікі 17 раёнаў вобласці. Карэспандэнты Belsat.eu адмыслова наведалі іўеўскія «Дажынкі», каб спраўдзіць, чым жа арганізатары свята здзівяць сёлета.
Трэш-кулінарыя ды пакатушкі на трактарах
Афіцыйнае адкрыццё свята суправаджалася традыцыйным шэсцем удзельнікаў з рэгіёнаў. Уздоўж старых вуліц шматнацыянальнага гораду расцягнуліся намёты з дзівоснымі гастранамічнымі вырабамі: дрэва з батонаў, смажанае кураня ў вобразе кабеты, вожыкі з яблыкаў, гарбузоў ды запалак.
Сярод намётаў мітусіліся роставыя лялькі даволі не тэматычныя да гэтага свята.
Мінакі ж праяўлялі вялікую цікавасць да ляляк ды кулінарных вырабаў, фіксуючы ўсё на свае смартфоны.
«Весела і цікава, мы сям’ёй адмыслова прыйшлі пафоткацца на памяць», – усміхаючыся распавядае іўянка.
Больш за ўсё ўвагу мінакоў прыцягвала інсталяцыя з капусты, ляляк ды купюраў з беларускіх рублёў.
«Калі ў кагосьці не атрымліваецца завесці дзяцей, варта памацаць гэты цудоўны качан і ўсё атрымаецца», – тлумачыў аўтар інсталяцыі, дужы мужчына сярэдніх гадоў.
Збочыўшы да іўеўскага возера можна было патрапіць на выставу трактароў, кожнага жадаючага каталі трактарысты.
«Сядайце ў вагончык, сядайце! Пракачу!» – заахвочваў вусаты трактарыст.
«Адсаромецца і з’ехаць дамоў хутчэй»
Актыўны ўдзел у святкаванні «Дажынак» прымаў БРСМ. Рэспубліканскім саюзам моладзі была прадстаўлена асобная праграма – «Сельская эстафета» у якой прымалі ўдзел маладзёны з усіх рэгіёнаў Гарадзеншчыны. Разынкай праграмы былі аграрны баскетбол ды боўлінг.
Замест баскетбольнага кашу было алюмініевае вядро, а мяч замянілі бульбай. У боўлінгу ж задача была качаном капусты збіць бутэлькі з зернем.
Пацешыцца можна было яшчэ аграрным дартсам – патрапіць дроцікам у яблык.
Самыя моцныя маглі памерацца сілай у конкурсе па перакатванні цюкоў з саломай, або пабіцца мяхамі з сенам, стоячы на бервяне.
На завяршэнні эстафеты канкурсанты выступілі ў музычным конкурсе «Сельскі аркестр», дзе замест музычных інструментаў выкарыстоўвалі рыдлёўкі, вілы, граблі, вёдры ды іншыя прылады працы на агародзе.
Галоўная ўмова была пад час выступу прадстаўляць персанажаў казкі «Калабок».
«Адсаромецца і з’ехаць дамоў хутчэй», – коратка дзеліцца ўражаннямі малады хлопец з Астраўца.
Выконвалі канкурсанты ў асноўным песні сучасных расейскіх поп-выканаўцаў, але сярод папсы гучалі песні з ранняга перыяду творчасці Сяргея Міхалка. Асабліва парадавалі сваім выступам сябры БРСМ з Ваўкавышчыны, выканаўшы песню Лявона Вольскага «Тры чарапахі».
Пасля афіцыйнай часткі большасць удзельнікаў конкурсаў хутка сабраліся і паспяшылі дамоў.
Што такое «Дажынкі» і калі іх пачалі адзначаць?
Паводле даследаванняў Яўхіма Карскага, першыя згадкі пра святкаванне «Дажынак» датуюцца ХІІ стагоддзем, але сама традыцыя можа браць пачатак з часу неаліту, калі на беларускіх землях развілася земляробства. Гэтым святам нашыя продкі адзначалі сканчэнне жніва. Пад час святкаванняў людзі адпачывалі ад цяжкай штодзённай працы ды радаваліся сабранаму ўраджаю.
У Магілёве сёння таксама святкавалі «Дажынкі». Там мясцовых жыхароў заахвочвалі гульнямі з каларадскім жуком і метровай каўбасой.
Мікола Дзямідаў. Фота: Васіль Малчанаў/Belsat.eu
