Кантрабандысцкі hi-tech: беларускія памежнікі затрымалі дрызіну-беспілотнік (ВІДЭА)

Незвычайны сродак перамяшчэння нелегальных тавараў збіў з рэек супрацоўнік памежнай службы.

Міні-цягнік, які рухаўся 11 студзеня з літоўскага боку мяжы, зафіксавала аўтаматычная сістэма відэаназірання.

Памежны нарад спыніў імправізаваную металёвую тачку ў 200-х метрах ад беларуска-літоўскай мяжы.

Беспілотная каляска была вырабленая саматужна, вонкава падобна на дрызіну ў мініяцюры. Яе прыводзіў у рух электрарухавік ад двух акумулятараў. На раме расцягнутая сетка для перавозкі кантрабанды – напрыклад, скрыняў з цыгарэтамі.

У Памежным камітэце мяркуюць, што кантрабандысты выпрабавалі дрызіну для «разведкі» мясцовасці і новай трасы. Аднак новы метад перапраўкі нелегальнага тавару аказаўся правальным, паведамляе gpk.gov.by.

Цалкам верагодна, што дрызіна вярталася ў Беларусь пасля паспяховага перакідвання – Літва з’яўляецца стандартным напрамкам беларускіх кантрабандных цыгарэтаў.

Цяпер высвятляюць асобы тых, хто мае дачыненне да супрацьпраўнай дзейнасці на мяжы.

ДР belsat.eu