Бізнесовец запісаў жорсткі відэазварот да кіраўніка краіны.
Былы ўладальнік некалькіх менскіх рэстарацыяў Вадзім Пракопʼеў запісаў жорсткі зварот да Аляксандра Лукашэнкі. У чорна-белым відэа на працягу амаль 8 хвілінаў ён прыгадвае кіраўніку краіны ўсе грахі і папярэджвае — канец блізка.
«Я ведаю, што ў цябе ў галаве. Хочаш паралізаваць нашую волю. Хочаш пасеяць роспач, запалохаць на ўзлёце, раздрабіць. Скрасці выбары, а потым палітзняволенымі пагандлявацца з Пампэа. А потым, каб мы аддаліся меланхоліі. Не, мая лапачка, на гэты раз не пралезе, на гэты раз усё інакш», – так Пракопʼеў пачынае сваю прамову.
Вадзім Пракопʼеў кажа, што раней Лукашэнка сапраўды меў рэальную перавагу. Аднак сёлета ўсё інакш. Рэстаратар кажа, што атачэнне адчувае, што ў рэчаіснасці ён прайграў. Аднак працягваюць падсоўваць фальшывую аналітыку ды залагоджваць кіраўніцтва.
Ён сцвярджае, што нават былыя прыхільнікі Лукашэнкі ўжо ўцямілі, «ачнуліся ад гіпнозу». Усе ведаюць імёны забітых палітыкаў. А былыя «прыкарытнікі» пралічваюць варыянты адступлення.
«Аднак у нас усе крокі запісаныя. Усім зімоўскім прыгадаем. На кім крыві няма – выйсці са строю, вольна, разысціся. Мы ўсё разумеем – слабы чалавек. У яго сямʼя, іпатэка, машына ў крэдыт».
Аднак з тымі, на кім ёсць кроў рэстаратар не плануе быць літасцівым. Усіх правакатараў, людзей з танаваных мікрааўтобусаў, тых, хто даваў ілжывыя паказанні – усіх пад суд. Асаблівым спісам пойдуць асобы, якія фальсіфікавалі выбары. З астатнімі жа Пракопʼеў прапаноўвае доўга і пільна разбірацца.
Для Лукашэнкі жа рэстаратар бачыць значна менш варыянтаў: смерць або ўцёкі.
«А як інакш? Забойства, калі і не замаўляў, то прыкрываў. Над нормамі права здзекаваўся. Грошы рассовываў мітусліва па катарах і дубаях», – кажа Пракопʼеў.
У дзень смерці Лукашэнкі ў краіне скончыцца шампанскае, а незнаёмыя людзі будуць танчыць на вуліцах гарадоў.
«Аднак Гаага ўсё роўна чакае. Так што спі і бойся, мой малыш. Канец блізка».
Напрыканцы роліка пералічваюцца імёны беларускіх палітзняволеных.
КТ belsat.eu