Камітэт Сусветнага антыдопінгавага агенцтва (ВАДА) прапанаваў на 4 гады адхіліць Расею ад міжнародных спаборніцтваў. Прычынай такой рэкамендацыі сталі падазрэнні, што базай Маскоўскай антыдопінгавай лабараторыі маніпулявалі.
Камітэт рэкамендаваў не пускаць Расею на Алімпійскія і Паралімпійскія гульні, любыя чэмпіянаты свету ды іншыя буйныя спаборніцтвы.
Да буйных спаборніцтваў прапануецца дапускаць толькі «чыстых» расейскіх спартоўцаў, якіх не падазравалі ў прыёме допінгу. Ім дазволяць выступаць пад нейтральным сцягам і без выканання расейскага гімну ў выпадку іх перамогі. Таксама прапануецца забараніць падымаць сцяг Расеі на буйных спаборніцтвах.
Апроч таго, камітэт прапанаваў забараніць Расеі 4 гады праводзіць любыя міжнародныя спаборніцтвы. Раней атрыманыя правы правесці спартыўныя падзеі неабходна адклікаць. Таксама прапанавана забараніць Расеі прэтэндаваць на правядзенне Летняй Алімпіяды ў 2032 годзе.
Расейскае антыдопінгавае агенцтва (РУСАДА) будзе павінна аплаціць усе выдаткі ВАДА са студзеня 2019 года і выплаціць самы максімальны з магчымых штраф.
Камітэт ВАДА даў такія рэкамендацыі праз магчымыя махінацыі з допінг-пробамі 2012-2015 гадоў. Выканкам ВАДА разгледзіць рэкамендацыі на пасяджэнні 9 снежня.
МГ belsat.eu
