Камітэт атлетаў Сусветнага антыдопінгавага агенцтва (WADA) напярэдадні разгляду пытання аб санкцыях супраць Расеі заклікаў цалкам адхіліць расейскіх спартоўцаў ад Алімпіядаў да 2022 года ўключна. Пра гэта паведамляе BBC.
У Камітэт атлетаў WADA уваходзяць 17 вядомых у мінулым спартсменаў. Яны лічаць недастатковым прапанову Міжнароднага алімпійскага камітэту дазволіць «чыстым атлетам» з Расеі спаборнічаць у Японіі пад нейтральным сцягам.
На іх думку, адзіным правільным рашэннем стане поўная забарона расейцам выступаць на двух наступных Алімпіядах. У адваротным выпадку расейскія ўлады працягнуць маніпуляваць і парушаць правілы.
Раней за максімальныя санкцыі ў дачыненні да Расеі выступілі антыдопінгавыя агенцтвы ЗША і Вялікай Брытаніі.
А Камітэт WADA прапанаваў на 4 гады адхіліць Расею ад міжнародных спаборніцтваў праз падазрэнні, што базай Маскоўскай антыдопінгавай лабараторыі маніпулявалі.Камітэт рэкамендаваў не пускаць Расею на Алімпійскія і Паралімпійскія гульні, любыя чэмпіянаты свету ды іншыя буйныя спаборніцтвы.
Да буйных спаборніцтваў прапануецца дапускаць толькі «чыстых» расейскіх спартоўцаў, якіх не падазравалі ў прыёме допінгу. Ім дазволяць выступаць пад нейтральным сцягам і без выканання расейскага гімну ў выпадку іх перамогі.
Канчатковае рашэнне будзе прынятае 9 снежня ў Лазане.
МГ belsat.eu