Ахова рэчыцкага гіпермаркету «Еўраопт» на вуліцы Пралетарскай, 118 без ведама калектыву размясціла ў жаночай раздзявалцы з душавой відэаназіранне. Пасля скаргі ў міліцыю на несанкцыянаваныя здымкі ды патрабаванне пакараць вінаватых працаўніцу цэху вырабу паўфабрыкатаў звольнілі за прыход на працу ў нецвярозым стане. Жанчына кажа, што гэта паклёп і кара за тое, што яна не маўчала і выкрывала парушэнні.
Ірына Басарановіч адпрацавала ў рэчыцкім «Еўраопце» больш за год. Жанчына займалася паўфабрыкатамі ў цэху вырабу мясной прадукцыі. Праблемы ў яе пачаліся напрыканцы мінулага года. 4 снежня ў краму прыехалі прадстаўнікі аховы гандлёвай сеткі ў Гомельскай вобласці, завялі ўсіх у кабінет з відэакамерамі ды паказалі запісы, як дзяўчаты сядзяць і ядуць у раздзявалцы. Працаўніц абвінавацілі ў крадзяжы вырабаў «Еўраопту» і запатрабавалі аплаціць страты, інакш пагражалі напісаць на іх заяву ў міліцыю.
«Нас змусілі заплаціць не за адну катлету, а за кілаграм вырабаў. Хто за катлету плаціў, хто за піццу. У іх нават не было доказаў, што я яе не з дому прынесла. Нас запужалі, адна жанчына нават плакала, але ніхто не сварыўся, усе заплацілі. Мы ж там і ў душ ходзім, голыя ходзім, пераапранаемся. Нас адпусцілі, але забаранілі што-кольвек браць», – распавядае Ірына belsat.eu.
Калі пра сітуацыю даведаўся муж Ірыны Дзмітрый Басарановіч, ён неадкладна пазваніў на гарачую лінію «Еўраопту», дзе яму сказалі, што гэткімі пытаннямі не займаюцца. У выніку мужчына дазваніўся да намесніка начальніка аховы «Еўраопту» ў Гомельскай вобласці Ігара Курбатава. Дзмітрый патрабаваў тлумачэнняў, знішчэння запісу і пакарання вінаватых.
«Пасля была размова з начальнікам аховы «Еўраопту» Гомельскай вобласці Мікалаем Спірыдовічам. Усе мяне пачалі пераконваць, што ніякіх камераў там не было і быць не можа, бо за такое пагражае крымінальная адказнасць. Дырэктарка крамы Алена Рудэнка ніяк не зрэагавала, маўляў, пра камеры нічога не ведала і не мае дачынення да аховы. Як без ведама кіраўніцтва можна такое зрабіць?» – задаецца пытаннем муж Ірыны.
Начальнік аховы «Еўраопту» Гомельскай вобласці Мікалай Спірыдовіч, які адказвае за ўсталяванне камераў відэаназірання, ад каментароў belsat.eu адмовіўся.
8 снежня Ірына выйшла на працу пасля выходных і камеры не пабачыла – яе знялі, а праз некалькі дзён на тым месцы з’явілася новая прылада – сігналізацыя. Тады Дзмітрый пайшоў са скаргаю ў пракуратуру, а Ірына са зменшчыцамі напісала калектыўную заяву ў аддзел Рэчыцкага РАУСу. Паводле Дзмітрыя, ліст падпісалі дзесяць асобаў, аднесла ў міліцыю яго Ірына, таму яе і зрабілі крайняй.
«Спачатку нам адмовілі ў распачынанні справы, бо ў ходзе іхнага правярання сістэмы назірання не выявілі. Яны нават не апыталі ўсіх, хто скардзіўся. Мы не пагадзіліся, 13 студзеня з пракуратуры нам адказалі, што рашэнне пра адмову распачынання справы скасавалі і адправілі справу на перагляд. Вынікаў дасюль няма», – кажа Дзмітрый.
Ірына заўважае, што пабачыла датчык за два тыдні да канфлікту. Былая працаўніца «Еўраопту» сцвярджае, што абсталяванне з’явілася пасля таго, як двух службоўцаў затрымалі з мясам. Іх адхілілі ад працы на месяц, а ў гэтым часе паставілі камеры.
«Колькі там было гэтага мяса, у краме больш псуецца і больш вывозяць уціхую. Іх прымусілі аплаціць яшчэ і нястачу на 1100 рублёў у віна-гарэлкавым аддзеле. Людзі баяцца пярэчыць, баяцца згубіць працу. У нас аклады 120-140 рублёў, рэшта прэміі. І калі ты дырэктару няўгодная, то яе абразаюць», – абураецца жыхарка Рэчыцы.
15 снежня яна выйшла на працу пасля дня народзінаў, адпрацавала змену з 7 да 15, пасля чаго яе выклікала Святлана Кузьмянок, якая замяняла начальніцу цэху Ларысу Кваснікаву, каб спраўдзіць ейную цвярозасць. Жанчына кажа, што была настолькі прыгнечаная і расхваляваная, што нават не паглядзела, які вынік паказаў апарат.
«Іра піла віно, закусвала. Яе праверылі пасля ночы і паловы дня. Медыкаў, якія маглі афіцыйна пацвердзіць факт нават рэштавага ап’янення, яны не выклікалі. Толькі пазней мы даведаліся, што гэта незаконна», – зазначае Дзмітрый Басарановіч.
Праваабаронца Леанід Судаленка ў каментары belsat.eu адзначыў, што толькі доктар можа пацвердзіць, п’яны чалавек або не.
«Без медычнага агляду любое падазрэнне на нецвярозасць працаўніка нікчэмнае. Ані характэрны пах з вуснаў, ані няцвёрдая паходка, ані невыразная мова – усё гэта не фактар ап’янення, а суб’ектыўнасць. Доктар павінен даць заключэнне. Ёсць норма кодэксу, што калі суд будзе на ейным баку, а яна не захоча вяртацца на месца працы, то можа запатрабаваць кампенсацыю памерам сваіх дзесяці сярэдніх выплатаў», – кажа юрыст. Аднак скаргу трэба падаць цягам 30 дзён пасля звальнення.
Начальніца жыхаркі Рэчыцы Ларыса Кваснікава сцвярджае, што ейная былая працаўніца «прагульвала, піла піва на працы, таму сама вінаватая». Аднак былая калега Ірыны з цэху Наталля гэтую інфармацыю зняпраўджвае. Яна кажа, што праблемаў з ёй не было, і каб тая піла на працоўным месцы, не бачыла. Не згодны з адмоўнымі характарыстыкамі і муж Ірыны:
«У кастрычніку летась у мяне была траўма, Ірына засталася дапамагчы. Яна ўпершыню ўзяла два дні за свой кошт, хоць у яе быў дзень адгулу. Яе ніхто не падмяніў, хоць і папярэджвала, за што была пазбаўленая паловы заробку».
Ніводнай правіны жонкі дакументальна не аформлена і не пацверджана, дадае ён. Мужчына, адзначае, што ў Ірыны граматы і падзякі з былых месцаў працы, а пазбавіліся ад яе, бо яна скардзілася начальніцы на няякасную прадукцыю, гнілое мяса ды іншыя парушэнні.