Камандзір АМАПу ГУУС Менгарвыканкаму Дзмітрый Балаба заявіў, што ягонае падраздзяленне менскага АМАПу гатовае да магчымых вясновых акцыяў пратэсту. Пра гэта ён распавёў у эфіры тэлеканалу СТВ.
Каментуючы пытанне аб магчымых акцыях пратэсту ўвесну, Балаба адказаў:
«Дзейнасць нашага падраздзялення палягае на тым, каб быць у пастаяннай баявой гатовасці, таму мы гатовыя заўсёды. І паверце, адказ заўсёды будзе парытэтным.
Мы, вядома, рыхтуемся да выканання нашых задачаў з улікам зменлівай абстаноўкі ў свеце – што адбываецца ў нас, у суседніх краінах. Так дыктуе час. Час ніколі не стаіць на месцы, і ў нагу з часам крочыць і развіваецца наша падраздзяленне».
Таксама Дзмітрый Балаба сказаў, што звальненне супрацоўнікаў з структуры АМАПу – гэта проста фэйкі, і заявіў, што статыстыка была падлічаная няправільна, а дынаміка камплектавання падраздзялення цяпер нават лепшая, чым у мінулым і пазамінулым гадах.
«У любой грамадзянскай арганізацыі ідзе пастаянны рух, перамяшчэнне. Хтосьці пераводзіцца, хтосьці знаходзіць сабе новае месца, хтосьці сыходзіць на пенсію, на іх месца прыходзяць маладыя», – заявіў камандзір менскага АМАПу.
АД, belsat.eu
