Каля 33 тысячаў заўзятараў прыехалі на ЧС па футболе праз Беларусь


Найбольш актыўна паглядзець на футбольныя матчы на сусветным першынстве ў Расеі ехалі ўласна расейцы, потым палякі, аргентынцы, амерыканцы, мексіканцы і бразільцы.

Праз Нацыянальны аэрапорт Менск прыбыло на чэмпіянат больш за 11 тысяч замежнікаў, паведаміў афіцыйны прадстаўнік Дзяржаўнага памежнага камітэту Антон Бычкоўскі.

Аднак у асноўным аматары футбола ехалі на сусветны футбольны фэст на чыгунцы – 16,7 тысячы чалавек. Пераважна яны прыбылі спецыяльна арганізаванымі на гэты час транзітнымі цягнікамі Калінінград-Масква.

Адпаведна ільвіная частка гэтых аматараў была грамадзянамі Расеі – жыхарамі Калінінградскага анклава.

Падчас цырымоніі закрыцця ЧС па футболе. Фота kremlin.ru

«Іх праехала праз беларускую мяжу каля 11 тысяч чалавек. Другімі па колькасці сталі палякі. Транзітам праз Беларусь праследавала прыкладна 5,3 тысячы жыхароў гэтай краіны», – паведаміў Бычкоўскі.

Раней паведамлялася, што праз Беларусь у Расею таксама ехалі грамадзяне Перу, Марока, Коста-Рыкі, Уругваю, Аўстраліі, Сальвадора і Ганы. Усяго праз Беларусь паглядзець футбол прыехалі заўзятары больш чым з 30 краін.

Аўтамабільным транспартам прыехалі праз Беларусь на першынства свету каля 4,8 тысячы чалавек. Пешымі праз мяжу прайшлі 58 чалавек.

Чэмпіянат свету праходзіў у Расеі з 14 чэрвеня па 15 ліпеня. Беларусь і Расея падпісалі 29 траўня міжурадавае пагадненне пра транзіт грамадзянаў трэціх краінаў на міжнародныя спартовыя імпрэзы. На час чэмпіянату для заўзятараў быў уведзены бязвізавы рэжым на тэрыторыі Беларусі з 4 чэрвеня па 25 ліпеня.

Аляксандр Гелагаеў, belsat.eu

Стужка навінаў