Днём 19 красавіка, за некалькі гадзін да пачатку дэбатаў кандыдатаў у прэзідэнты Украіны, на Майдане Незалежнасці выступіў Пётр Парашэнка і ўкраінскія чыноўнікі. На плошчы сабралася некалькі тысяч чалавек. Затым частка праціўнікаў Зяленскі прайшла па Крышчаціку да стадыёну «Алімпійскі».
У цэнтры Майдана ўсталявалі вялікую сцэну, на якой спачатку выступілі артысты, а затым да народа звярнуліся спікер Вярхоўнай Рады Андрэй Парубій, некалькі міністраў і дзейны прэзідэнт. Парашэнка прайшоў праз натоўп, падняўся на сцэну пад гукі казацкага маршу і падзякаваў прысутным за падтрыманне.
«Гэта не выбар паміж Зе! і Парашэнка, як камусьці здаецца. Мы з вамі ведаем дакладную стаўку на гэтых выбарах – ці працягне Украіна свой шлях у ЕЗ і NATO, ці зноў усё будзе спушчана на тармазах», – заявіў ён.
Выступ Парашэнкі прагучаў вельмі эмацыйна: свайго апанента ён назваў «ухілістам» ад службы ў войску і дадаў, што за Зяленскім «усё часцей прамалёўваецца вобраз Маларосіі». Па словах Парашэнкі, менавіта аб такім «слабым прэзідэнце-пачаткоўцы і хаосе марыць Уладзімір Пуцін».
Сваю прамову ён завяршыў абяцаннем:
«Калі мяне абяруць 21 красавіка, Пуціна ў бліжэйшыя 5 гадоў чакае гучны правал ва Украіне».
Прыкладна а 14.40 ад натоўпу на Майдане аддзялілася група людзей з нацыянальнымі сцягамі і сімволікай УНА-УНСО.
Сярод арганізатараў шэсця – сябры грамадзкай ініцыятывы «Абарані Украіну», якая выступае за «мабілізацыю супраць рэваншу, супраць расейскага ўмяшальніцтва», пагрозу якога яны бачаць у перамозе Зяленскага. Галоўныя патрабаванні ўдзельнікаў маршу – еўраінтэграцыя, умацаванне арміі і нацыянальнай бяспекі, падтрымка ўкраінскага мовы і аўтакефальнай царквы.
«У гэтым шэсці сёння ўдзельнічаюць тыя, хто складаў касцяк самаабароны Майдана ў 2014 годзе, тыя, хто выступаў за збавенне Украіны ад дыктатарскага рэжыму Віктара Януковіча. У нас ёсць адчуванне, што цяпер нам з падачы часткі алігархату і расійскіх лялькаводаў запіхвае абноўленую версію Януковіча, якому не важная ні незалежнасць, ні наша ідэнтычнасць» – сказаў «Белсату» Сяргей Высоцкі, народны дэпутат ад партыі «Народны фронт».
Дэпутат абвінавачвае Зяленскага ў тым, што ў 2014 годзе, калі «было не да жартаў», той выступаў з канцэртамі перад расейцамі.
«Мы хочам паказаць кандыдату ў прэзідэнты Зяленскаму, ды і кандыдату Парашэнка, што Майдан не памёр, ён жывы, і калі трэба, Майдан выйдзе яшчэ раз», – дадаў Высоцкі.
Нагадаем, сёння а 19.00 па мясцовым часе на кіеўскім стадыёне «Алімпійскі» адбудуцца дэбаты паміж кандыдатамі ў прэзідэнты украіны Уладзімірам Зяленскім і Пятром Парашэнкам. Другі тур выбараў прызначаны на 21 красавіка. Карэспандэнты «Белсата» будуць сачыць за развіццём падзеяў на месцы.
Кацярына Андрэева/МВ, belsat.eu