Кіраўніца Савету Рэспублікі Наталля Качанава зладзіла сустрэчу са студэнтамі журфаку БДУ. Трапіць на мерапрыемства змаглі не ўсе жадаючыя. Вядома, што чыноўніца распавядала пра тэорыю змовы і нядзельныя маршы.
Паводле «Нашай Нівы», у аўдыторыю, дзе адбывалася сустрэча з кіраўніцай Савету Рэспублікі Наталляй Качанавай, пускалі толькі запрошаных студэнтаў. На ўваходзе стаяў ахоўнік, які глядзеў, ці ёсць прозвішча студэнта ў яго спісе. У будынку журфаку было шмат сілавікоў.
Качанава паставіла студэнтам відэа, дзе зачытваўся «План Даллеса»
Пасля пытання студэнтаў пра Балонскі працэс, Наталля Качанава раптам паставіла студэнтам відэазапіс з завяшчаннем Даллеса, паведамляе TUT.BY.
З дынаміка гучала вось што:
«І мы кінем усё што маем, усё золата, усю матэрыяльную моц на абалваньванне і адурачванне расейскіх людзей. Пасеяўшы ў Расеі хаос, мы непрыкметна падменім іх каштоўнасці на фальшывыя і прымусім іх, расейцаў, у гэтыя фальшывыя каштоўнасці верыць. Эпізод за эпізодам будзе разыгрывацца грандыёзная па сваім маштабе трагедыя гібелі самога непакорлівага на зямлі народу, канчатковае, незваротнае згасанне яго самасвядомасці».
Наталля Качанава пра нядзельныя акцыі
«Вось гэтыя ўсе выхады, якія сёння ёсць у краіне, яны ж вядуць да аднаго. Яны ні да чаго добрага не прывядуць», – заявіла Качанава.
«Калі заўтра пачнецца стральба, калі заўтра пачнецца вайна, то ў гэтым будзеце вінаватыя вы і ў тым ліку такія як вы».
Чыноўніца пераконвала, што на самой справе заходнія каштоўнасці не вартыя, каб імкнуцца да іх.
«Я ўпершыню выязджаю за мяжу. У крамах багацце, прыгожая краіна, людзі, усё ў парадку. Але ў гэты час ужо ў кінатэатрах ідуць парнаграфічныя фільмы, ужо сыходзіць духоўнасць і маральнасць. І праз некалькі гадоў усю краіну проста разбамбілі», – распавяла Качанава пра свой першы візіт у Югаславію ў 1989 годзе.
Стаўленне да незалежных медыяў
«Як я магу ставіцца да« Нашай Нівы»? Ну напрыклад. Калі я кожны раз там чытаю толькі хлусню пра саму сябе. Прычым першы раз я, калі перайшла працаваць у Менск. Я вам так скажу – я прыехала з рэгіёну, такая адкрытая. Заўсёды, працуючы там, у сябе, вельмі адкрыта працавала з усімі сродкамі масавай інфармацыі. І да мяне [у Менску] адразу ўсе СМІ – і БТ, і ОНТ знялі, паказалі, запісалі.
І вось я чытаю ў «Нашай Ніве» раптам артыкул пра сябе. І там такія факты хлуслівыя! Ну добра калі б яны напісалі пра мяне асабіста, а не пра маю сям’ю. Калі гэта прачытала мая мама, яна была проста ў шоку. Хто мой першы муж, другі, пляменнікаў нейкіх маіх паўзгадвалі… Прычым столькі было ілжывага. І гэта паўсюль і цяпер працягваецца. Потым я перайшла працаваць у калегію Міністэрства аховы здароўя. Я кажу адно, прычым выступала, лекары пішуць: «Дзякуй, Наталля Іванаўна, за падтрымку», – а яны пішуць: «Як робяць, так І зарабляюць». Але я не так казала».
Качанава ахарактарызавала Азаронка
«Азаронак… Гэта карэспандэнт… Які працуе на СТВ. Вам не падабаецца ён?»
Некаторыя ў аўдыторыі смяюцца.
«Для таго, каб мне быць абʼектыўнай у гэтым, давайце я паспрабую СТВ зараз глядзець, добра? СТВ я гляджу ўвечары, я не ўбачыла, што б мяне абурыла. Можа быць, я не ўбачыла. Не ведаю, пагляджу. Азаронак? Добра».
Увогуле Качанава не бачыць нейкіх праблемаў і хлусні на дзяржаўным тэлебачанні.
«Я не бачыла ілжы на БТ. Ці бачылі вы – скажыце. Але называць уладу фашыстамі нельга. Тое, што асвятляюць нашыя таварышы, якія з’ехалі за мяжу, як да гэтага ставіцца? Яны ж вяшчаюць хлусню. Пакуль у тым, што я бачу на дзяржСМІ, не бачу фактаў ілжы».
СК belsat.eu
Напішы журналісту ліст
Тры беларускія журналісткі ўтрымліваюцца цяпер за кратамі і маюць абвінавачванні паводле крымінальных артыкулаў: Кацярына Андрэева («Белсат»), Дарʼя Чульцова («Белсат»), Кацярына Барысевіч (TUT.BY).
Адным з моцных спосабаў падтрымаць дзеўчын можа стаць ваш ліст да іх.
Куды пісаць:
Кацярына Андрэева (Бахвалава): 222160 г. Жодзіна, вул. Савецкая, д. 22а.
Дарʼя Чульцова: 222160 г. Жодзіна, вул. Савецкая, д. 22а.
Кацярына Барысевіч: СІЗА № 1, 220030 г. Менск, вул. Валадарскага, д. 2.
Не забудзьцеся ўкласці ў ліст пусты канверт, каб дзеўчыны маглі вам адказаць. Дзякуем за вашую неабыякавасць!
