Улады Беларусі адмаўляюцца апублікаваць праграму інтэграцыі з Расеяй, якую падпісалі 6 верасня прэм’еры дзвюх краінаў. Гэта вынікае з адказу міністра эканомікі Дзмітрыя Крутога на запыт дэпутаткі Палаты прадстаўнікоў Алены Анісім.
Дакумент Алена Анісім апублікавала ў «Facebook’у».
Вось фота адказу па просьбе сяброў.
Opublikowany przez Alenę Anisim Środa, 18 września 2019
У адказе міністр адзначыў, што сама праграма пакуль мае статус працоўнага дакументу, бо яе мусяць зацвердзіць кіраўнікі Беларусі і Расеі ў снежні разам з пакетам дарожных мапаў, у якіх і будзе «дэталізацыя эканамічных дамоўленасцяў паміж бакамі».
Паводле Дзмітрыя Крутога, публікацыя праекту праграмы без пакету мапаў супярэчыць агульнапрынятай у свеце практыцы арганізацыі перамоваў, а таксама магла б стварыць глебу для інфармацыйных маніпуляцыяў і фармавання скажоных уяўленняў пра інтэграцыю. Пры гэтым ён запэўніў, што дакументы не пагражаюць суверэнітэту і незалежнасці Беларусі.
Разам з тым, як паведамілі TUT.BY ў Міністэрстве фінансаў, ведамства ўжо плануе стварыць камісію, якая пачне працу над падрыхтоўкай праекту адзінага Падатковага кодэкса Беларусі і Расеі.
МГ belsat.eu
