«Ісламская дзяржава» пакарала смерцю дзясяткі сваіх камандзіраў за спробу бунту

Тэрарыстычная групоўка «Ісламская дзяржава» пакарала смерцю цэлы шэраг камандзіраў яе падраздзяленняў у Масуле за іхныя планы здаць горад іракскім войскам.

Усяго, паводле звестак «The Sunday Times», забітыя 54 чалавекі.

Тэрарыстычная групоўка «Ісламская дзяржава» (ІД) пакарала смерцю цэлы шэраг камандзіраў яе падраздзяленняў у іракскім Масуле, калі даведалася пра іхныя намеры дапамагчы іракскім войскам вярнуць горад пад свой кантроль. Пра гэта ў суботу, 15 кастрычніка, паведаміла на сваім сайце брытанскае выданне «The Sunday Times» са спасылкай на іракскіх афіцыйных асоб.

• «Ісламская дзяржава» ўзяла адказнасць за напад на гандлёвы цэнтр у Мінэсоце
• «Ісламская дзяржава» становіцца папулярнаю сярод моладзі
• «Ісламская дзяржава» ўжо ў Расеі

Паводле гэтых звестак, усяго былі забітыя 54 чалавекі. Гэта адбылося пасля таго, як на мінулым тыдні ў аднаго са змоўнікаў на карце памяці мабільнага тэлефона было выяўленае паведамленне, у якім гаворка ішла пра ўзбраенні джыхадыстаў.

«ІД перадухіліла ўнутраны пераварот, накіраваны супраць лідараў арганізацыі. Усе змоўнікі забітыя. Большасць з іх займалі кіроўныя пасады», – паведаміў «The Sunday Times» адзін з чальцоў рады правінцыі Нінэвія на поўначы Іраку.

Тым часам вайскова-паветраныя сілы Іраку ў суботу, 15 кастрычніка, скінулі на Масул тысячы ўлётак, у якіх паведамілі гараджанам пра рыхтаваны наступ. «Прыйшоў час перамогі, час праславіць… Ірак без »Ісламскай дзяржавы« і змрочных вераванняў», – цытаваліся ў пасланні словы прэмʼер-міністра Іраку Хайдэра аль-Абадзі (Haider al-Abadi). Мясцовым жыхарам рэкамендавана пазбягаць раёнаў, у якіх размешчаны пазіцыі экстрэмістаў, па магчымасці заставацца дома і забарыкадаваць вокны і дзверы.

МЯ, паводле dw.com