Афіцыйна прадстаўніца Следчага камітэту Юлія Ганчарова паведаміла, што пракуратура выдала дазвол на арышт выконваючага абавязкі начальніка ДАІ Баранавічаў Андрэя Валкавыцкага. Дагэтуль міліцыянт знаходзіўся ў СІЗА.
Інспектара падазраюць у тым, што ён 26-га лістапада каля 21-й гадзіны ехаў пʼяны на ўласным аўта і недалёка ад вёскі Дарава насмерць збіў 36-гадовую жыхарку Слуцка Вольгу Стралкоўскую. У жанчыны засталіся грамадзянскі муж і двое няпоўнагадовых дзяцей.
У крыві Валкавыцкага на момант затрымання было 3 праміле алкаголю (дапушчальны паказнік – 0,3).
Следчы камітэт распачаў крымінальную справу. Яму пагражае да сямі гадоў пазбаўлення волі. Да суду Валкавыцкі застанецца пад вартай.
ДР belsat.eu