Ігар Шуневіч супраць паслаблення адказнасці за ўжыванне наркотыкаў


Кіраўнік МУС Ігар Шуневіч заявіў, што міліцыя не вітае паслабленне адказнасці для спажыўцоў наркотыкаў.

«Паслабленне адказнасці мы не вітаем, таму што спажывец сам па сабе – гэта рынак, стварэнне наркарынку ў краіне. Не займацца ўнутраным спажываннем, а проста змагацца з каналамі – гэта занадта аднабока, плёну не дасць. Трэба разнавектарныя намаганні прыкладваць – і са спажыўцамі, і з наркадылераў, і з кур’ерамі змагацца», – цытуе Шуневіча TUT.by.

Паводле Шуневіча, «кожны наркаман за час сваёй «прафесійнай дзейнасці» ад 8 да 10 чалавек уцягвае ў спажыванне».

Нагадаем, прадстаўніцы руху «Маці-328», які аб’ядноўвае сваякоў тых, хто трапіў за краты паводле арт. 328 Крымінальнага кодэксу (незаконны абарот наркотыкаў), лічаць тэрміны пакарання для спажыўцоў празмерна вялікімі і актыўна выступаюць за змены ў заканадаўстве. Гэткую думку падзяляюць і прадстаўнікі грамадзянскай супольнасці.

Адказваючы на ​​пытанне журналістаў, ці магчыма зніжэнне тэрмінаў для падлеткаў, Шуневіч заявіў:

«Калі заканадаўцы палічаць, што для нейкай катэгорыі грамадзянаў гэта магчыма, я ў гэтым асабліва вялікай бяды не бачу. Але МУС не перастане працаваць з спажыўцамі, мы будзем выяўляць тых, хто спажывае наркотыкі, незалежна ад вагі, колькасці, кратнасці і г.д. Мы ініцыятарамі такога паслаблення выступаць не будзем».

Нагадаем, у снежні 2014 года Аляксандр Лукашэнка падпісаў так званы «антынаркатычны дэкрэт», які прадугледжвае больш жорсткае пакаранне за злачынствы, звязаныя з наркотыкамі. У наступныя гады колькасць асуджаных паводле артыкулу 328 КК РБ стала імкліва расці. Сваякі асуджаных і эксперты лічаць, што адбываецца паказальная барацьба з наркотыкамі, але пад ударам апынуліся не наркагандляры, а пераважна тыя, хто ўжываў лёгкія наркотыкі ў дробных памерах.

ІІ, belsat.eu

Глядзі таксама
Каментары