Пілігрымка на гелікоптэры: паспрабаваць духоўна адрадзіцца і спазнаць сябе можна будзе за гадзіну.
Менская рыма-каталіцкая парафія Святых Сымона і Алёны стала ініцыятарам новага фармату пілігрымак – верталётных вандровак з Менску ў Будслаў, падае афіцыйны партал Рыма-Каталіцкага Касцёла ў Беларусі.
У хрысціянскай традыцыі пілігрымка ці паломніцтва – спосаб духоўнага адраджэння і пазнання сябе праз пераадоленне пэўнага шляху.
Кожны год у першую пятніцу і суботу ліпеня ў вёсцы Будслаў Мядзельскага раёну Менскай вобласці адбываецца фэст у гонар абраза Маці Божай Будслаўскай, куды збіраюцца тысячы ўдзельнікаў пешых, роварных, аўтамабільных і матацыклетных пілігрымак. Свята збірае католікаў з усёй Беларусі, а таксама гасцей з Польшчы, Украіны, Расеі, Літвы і іншых еўрапейскіх краін.
У 2016 годзе Будслаўскі фэст быў унесены ўрадам Беларусі ў спіс нацыянальных нематэрыяльных гісторыка-культурніцкіх каштоўнасцяў краіны.
Праз верталётныя вандроўкі Касцёл можа паспрабаваць павялічыць зацікаўленасць людзей да пілігрымак увогуле, а дзяржава ў выглядзе Звязу турыстычных арганізацыяў хоча развіваць прывабнасць Будслава як турыстычнага абʼекту.
Палёты ў Будслаў выконвае менскі аэраклуб ДТСААФ, і ў красавіку ўжо адбыліся пробныя палёты па маршруце «Аэрадром Баравая – Будслаў».
Дамовіцца пра палёт да Будслава, дзе знаходзіцца шанаваны беларускімі хрысціянамі цудадзейны абраз Маці Божай Будслаўскай, можна па тэлефонах (017) 505-29-60 або 8 (017) 200-44-15.
Падобныя верталётныя пілігрымкі, як чакаецца, будуць арганізаваныя таксама і ў Жыровічы, якія, як і Будслаў, афіцыйна вызначаныя ўрадам як цэнтры рэлігійнага турызму ў Беларусі.
Пробашч парафіі Святых Сымона і Алёны (Чырвоны касцёл) ксёндз Уладзіслаў Завальнюк вядомы сваёй любоўю да авіяцыі: раней ён паступіў у Беларускую дзяржаўную акадэмію авіяцыі і быў прызнаны годным да палётаў на малых 2-х і 4-х мясцовых і спартовых самалётах.
Аляксандр Гелагаеў
