Супрацоўнікі АМАПу затрымалі некалькі чалавек на акцыі падтрымання блогера Сяргея Ціханоўскага.
Прынамсі некаторыя АМАПаўцы падчас затрымання былі ў медычных масках.
Паводле карэспандэнткі Belsat.eu Марыі Булавінскай, у акцыі ўзялі ўдзел 30-40 асобаў.
«Людзі спакойна ішлі па вуліцы. У натоўпе былі і людзі ў цывільным. Міліцыянт крычаў у гукаўзмацняльнік, што акцыя незаконная і патрабаваў разысціся. На яго не звярталі ўвагі. А пасля з буса павыскоквалі АМАПаўцы», – распавяла Марыя Булавінская, якая прысутнічала на акцыі.
Паводле відавочцаў, АМАП мог затрымаць ад 20 да 25 чалавек.
Сярод затрыманых былі журналісты TUT.BY і «Камсамольскай праўды». Пазней іх адпусцілі.
Усіх затрыманых адвезлі ў РАУС Цэнтральнага раёну Гомля.
7 траўня на YouTube-канале Сяргея Ціханоўскага «Страна для жизни» з’явілася ягоная заява аб намеры балатавацца ў прэзідэнты Беларусі. 6 траўня блогера затрымала міліцыя.
ЮВ belsat.eu