«Гэта ўжо не пляма, а дзіра». КДБ затрымаў за наркотыкі двух памочнікаў пракурора
Беларускія спецслужбы затрымалі двух працаўнікоў пракуратуры. Цяпер яны пад вартай, паведамляе Генеральная пракуратура на сваёй старонцы ў Facebook.
Затрыманыя два намеснікі пракурораў Савецкага і Ленінскага раёнаў Менску пракурораў. Справу распачаў і расследуе Камітэт дзяржаўнай бяспекі Беларусі.
Комитет государственной безопасности Республики Беларусь возбудил и расследует уголовное дело в отношении двух бывших…
Opublikowany przez Генеральная прокуратура Республики Беларусь Poniedziałek, 6 kwietnia 2020
Паводле звестак «Белсату», затрыманыя – намеснік пракурора Ленінскага раёну Яўген Маісеенка і намеснік пракурора Савецкага раёну Аляксей Ерафееў. Падчас затрымання яны былі ў адной машыне.
Затрыманыя – маладыя людзі. На сваіх пасадах знаходзяцца адносна нядаўна. Гэтак, Маісеенка быў прызначаны намеснікам пракурора Ленінскага раёну 2,5 гады таму – увосень 2017 года.
Супрацоўнікам пракуратуры інкрымінуюць незаконны абарот наркатычных сродкаў без мэты збыту паводле часткі 1 артыкула 328 КК. За гэта ім пагражае абмежаванне волі на тэрмін да пяці гадоў або пазбаўленне волі на тэрмін ад двух да пяці гадоў.
Падазраваныя змешчаныя пад варту і звольненыя з органаў пракуратуры.
Гэта не першы выпадак затрымання ў Беларусі праваахоўнікаў паводле наркатычнага артыкулу. Напрыклад, у 2016 годзе вынеслі прысуды арганізатарам буйной інтэрнэт-крамы для продажу наркотыкаў. Тады трое працаўнікоў праваахоўных органаў атрымалі па 14–15 гадоў.
Але не прайшло і года, як з абвінавачання выключылі шэраг эпізодаў пра наркотыкі і змянілі прысуд. Паводле рашэння Вярхоўнага Суда, былы працаўнік КДБ Дзмітрый Вераценскі мусіць адсядзець 9 гадоў замест 15, ягоны кадэбэшны калега Ігар Карыцкі ды былы міліцыянт Канстанцін Дзянісевіч – 8 гадоў замест 14. У студзені 2019 года Карыцкага ўжо заўважылі на волі, у родным Берасці, нягледзячы на тое, што адсядзеў ён толькі 4 гады. Ёсць звесткі, што на волі – яшчэ адзін фігурант справы.
Затрыманне двух працаўнікоў пракуратуры пракаментаваў belsat.eu праваабаронца Алег Волчак, які раней сам працаваў старшым следчым у пракуратуру Фрунзенскага раёну Менску.
Паводле яго, дзіўна, што ініцыятарам расследавання стаў КДБ, а не пракуратура.
«Там ёсць служба ўласнай бяспекі, і я ведаю, яна няблага працуе. Тут пытанне, ці то яна не дапрацавала, ці то там ёсць яшчэ, магчыма, іншыя працаўнікі, датычныя да гэтага злачынства», – сказаў суразмоўца.
На яго думку, зараз трэба «не па хвастах біць, а разабрацца, адкуль яны наагул узялі наркотыкі». У сувязі з гэтым Алег Волчак прыгадаў версію сваякоў асуджаных паводле артыкула 328 КК пра тое, што праваахоўнікі адмыслова робяць інтэрнэт-крамы для распаўсюду наркотыкаў, наймаюць туды распаўсюджвальнікаў, а праз некаторы час пачынаюць іх арыштоўваць.
«Калі яны былі ўдзельнікамі стварэння адмысловай сеткі для раскрыцця справаў, гэта таксама парушэнне закону, бо яны не маюць права правакаваць людзей на ўжыванне і распаўсюд наркотыкаў», – сказаў праваабаронца.
Пракуратуры трэба «адбельвацца»
Таксама, паводле Волчака, наркотыкі маглі застацца ў працаўнікоў пракуратуры пасля таго, як яны павінны былі пракантраляваць іх знішчанне паводле рашэння суду. На думку Алега Волчака, нельга выключаць, што частка наркотыкаў можа не знішчацца, а захоўвацца для згаданай вышэй дзейнасці.
У любым разе, заявіў ён, справа павінна дайсці да суду, бо пракуратуры трэба зараз «адбельвацца».
«Гэта ўжо не проста чорная пляма, гэта такая вельмі вялікая дзірка», – сказаў Алег Волчак.
Праваабаронца мяркуе, што пракурорам зараз будзе цяжка вярнуць давер грамадзянаў, калі яны будуць выступаць абвінаваўцамі на судовых працэсах паводле наркатычных справаў. Бо «не наркотыкамі ж ім гандляваць, і ўжываць», падкрэсліў ён.
МГ belsat.eu
