Гэта нашыя замежнікі. Польшча пакінула іншаземцаў з пратэрмінаваным часам побыту
Belsat.eu высветліў, як доўга і на якіх умовах у Польшчы могуць заставацца замежнікі, якім эпідэмія замінае легалізаваць перабыванне ці падоўжыць візу.
Эпідэмія каронавірусу – гэта тое, што нельга было прадбачыць, а таму і падрыхтавацца… раней падаць дакументы на працяг «карты побыту» ці на выраб чарговай візы. Польшча часова змяніла правілы прыбывання замежнікаў на сваёй тэрыторыі. Гэта датычыць 628 тыс асобаў, зарэгістраваных у падатковай. І яшчэ некалькіх соцень тысяч асобаў, якія не маюць у Польшчы афіцыйнай працы ці рэгістрацыі ў якасці беспрацоўных. Афіцыйная лічба беларусаў з відам на жыхарства – 25,6 тыс. Яшчэ 35 тысячаў – маюць або карту паляка, або візу – працоўную ці Шэнген.
18 красавіка ўлады Польшчы ўхвалілі змены ў заканадаўстве, якія даюць магчымасць замежнікам легальна знаходзяцца ў краіне на падставе шэнгенскіх віз або ў межах бязвізавага руху, даўжэй, чым дазваляюць ім дакументы. Правілы датычаць асобаў, якія хочуць ажыццявіць заяўленую ў візе мэту побыту (напрыклад, турызм, які не магчымы ў часе эпідэміі) або не могуць пакінуць Польшчу ў сувязі з распаўсюдам віруса SARS-CoV-2.
Цяпер дзяржустановы краіны зачыненыя для наведнікаў. Дакументы можна даслаць поштаю ці падаць іх у 30-дзённы тэрмін пасля адмены супрацьэпідэміялагічных захадаў. Гэта датычыць:
- легальнага знаходжання іншаземцаў, калі яго тэрмін мінае ў перыяд эпідэміялагічнай пагрозы або эпідэміі,
- тэрмінаў дзеяння карт побыту і часовых пасведчанняў асобы замежніка,
- падачы дакументаў на легалізацыю знаходжання,
- дзеяння выдадзеных раней дазволаў на працу, дазволаў на сезонную працу, а таксама заяваў працадаўцаў аб прыёме замежніка на працу.
Працяг легальнага прыбывання
Застацца на чарговы тэрмін можа замежнік, які знаходзіцца на тэрыторыі Польшчы на падставе:
- дазволу на часовае пражыванне,
- польскай нацыянальнай візы,
- Шэнгенскай візы або ў межах бязвізавага руху.
Такая магчымасць ёсць, калі апошні дзень легальнага знаходжання замежніка прыпаў на першы дзень ці наступныя дні эпідэміялагічнай пагрозы або эпідэміі. Гэта перыяд з 14 сакавіка 2020 года, калі ў Польшчы пачаў дзеяць стан эпідэмічнай пагрозы. У такім выпадку тэрмін легальнага знаходжання ў Польшчы працягваецца да канца 30-га дня з даты адмены эпідэмічнай пагрозы.
Калі гаворка ідзе пра замежнікаў, якія прыбываюць згодна з дакументамі на кароткачасовае знаходжанне (у тым ліку ў межах бязвізавага руху), легальным будзе прызнаны побыт толькі тых замежнікаў, якія 14 сакавіка 2020 года знаходзіліся на тэрыторыі Польшчы. Тыя, хто прыехаў у Польшчу пазней, павінныя падаць заяву на дазвол на побыт на падоўжаны тэрмін.
Легальнае знаходжанне ў гэты час не патрабуе дадатковых візаў ці штампаў у пашпарце, атрымання новай карты побыту або іншых дакументаў. Замежнік можа выконваць працу, калі гэта дазваляў ранейшы дакумент. І можа свабодна пакінуць краіну без дэпартацыі і пераймання пра наступствы нелегальнага побыту.
Працяг тэрмінаў дзеяння «карт побыту»
Новыя правілы прадугледжваюць працяг тэрмінаў дзеяння «карт побыту» і часовых пасведчанняў асобы замежніка (поль. TZTC – дакумент, які выдаюць замежнікам згодна з хадатайніцтвам аб прадастаўленні міжнароднай абароны). Тэрмін дзеяння «карты» падоўжаць, калі ён скончыўся ў перыяд стану эпідэмічнай пагрозы або эпідэміі. Тэрмін дзеяння гэтых дакументаў працягнуць да канца 30-га дня з даты адмены эпідэмічнай пагрозы.
Працяг тэрмінаў падачы дакументаў
Згодна з законам, падоўжыліся тэрміны падачы заявак на атрыманне дазволу на прыбыванне, падаўжэнне віз, а таксама прыбывання ў межах бязвізавага руху, калі гэты тэрмін прыпадае на перыяд стану эпідэмічнай пагрозы або эпідэміі. Як і ў выпадку з іншымі дакументамі, гэтыя заявы можна будзе падаць цягам 30-і дзён пасля афіцыйнага вяртання краны да звычайнага жыцця.
Анастасія Русецкая Belsat.eu
