«Гэта дзяржаўны вандалізм». Актывісты звярнуліся да Лукашэнкі з нагоды зносу крыжоў у Курапатах
Сёння пяцёра абаронцаў Курапатаў – Ганна Шапуцька, Дзяніс Урбановіч, Валер Рабцаў, Віталь Трыгубаў і Зміцер Казакевіч – зарэгістравалі ў Адміністрацыі прэзідэнта зварот на імя кіраўніка краіны з патрабаваннем вярнуць 70 знесеных крыжоў на месца.
У адкрытым звароце, пад якім актывісты паставілі подпісы, гаворыцца:, што 4 красавіка 2019 года стала «трагічным днём для беларускага грамадства».
«Вы пайшлі вайной супраць свайго народа, аддаўшы каманду на знішчэнне Курапацкіх крыжоў, якія грамадзяне Рэспублікі Беларусь усталявалі ў памяць аб беларусах, закатаваных, забітых сталіністамі ў 30-40-я гады ХХ стагоддзя», – звяртаюцца да Лукашэнкі аўтары звароту.
Яны адзначаюць, што працы па ўсталяванні крыжоў у свой час каштавалі 11 тысяч рублёў – гэтыя грошы збіралі праз краудфадынг. Актывісты таксама прыгадваюць: яшчэ ў 2002 годзе навуковы кіраўнік мемарыялу Курапаты Мая Кляшторная (дачка рэпрэсаванага паэта Тодара Кляшторнага) узгадніла з уладамі перыметр, дзе могуць быць пастаўленыя крыжы. Такім чынам, заканадаўства не было парушанае.
Хаця ўлады назвалі сёлетні дэмантаж крыжоў «добраўпарадкаваннем тэрыторыі ўрочышча», абаронцы Курапатаў называюць гэта «дзяржаўным вандалізмам».
У будынак Адміністрацыі прапусцілі толькі двух чалавек – Ганну Шапуцьку і Валера Рабцава. Яны зарэгістравалі зварот і прыклалі да яго дакумент 1993-га года аб зацвярджэнні канцэпцыі народнага мемарыялу ў Курапатах.
***
4 красавіка па рашэнні ўладаў у Курапатах дэмантавалі 70 крыжоў, усталяваных грамадскімі актывістаў. Міліцыя затрымала 15 чалавек, якія выказвалі сваю нязгоду з гэтымі дзеяннямі. Дырэктар Бараўлянскага спецлясгасу Аляксандр Мірановіч назваў працы ў Курапатах «добраўпарадкаваннем», а прэс-сакратарка Лукашэнкі Наталля Эйсмант заявіла, што дзяржава «зробіць усё, каб гэтае месца выглядала годна, але без усялякай палітыкі». Знос крыжоў яна патлумачыла адпаведным распараджэннем кіраўніка дзяржавы
KA belsat.eu
